काठमाडौं, ७ मंसिर । इजरायलले चारदिने गाजा युद्धविराम र बन्धकको रिहाइ कम्तीमा पनि शुक्रबारसम्म सुरु नहुने जनाएको छ । इजरायलको उक्त भनाइले हमाससँगको युद्ध रोक्न गरिएको महत्त्वपूर्ण सम्झौता कार्यान्वयनमा ढिलाइ भएको छ ।

इजरायलका राष्ट्रिय सुरक्षा सल्लाहकार जाची हानेग्बीले हमासद्वारा बन्धक बनाइएका कम्तीमा ५० जनाको रिहाइ अपेक्षाअनुसार बिहीबार नहुने संकेत गरेका छन् ।

“हाम्रा बन्धकहरूको रिहाइका निम्ति सम्पर्क अगाडि बढेको छ र यो जारी छ,” उनले एक विज्ञप्तिमा भनेका छन्, “रिहाइको सुरुआत पक्षहरूबीचको मूल सम्झौताअनुसार हुनेछ र शुक्रबारभन्दा पहिला हुने छैन ।”

अर्का इजरायली अधिकारीले युद्धमा अस्थायी रोक बिहीबार पनि सुरु नहुने बताएका छन् । यो ढिलाइ आफ्ना प्रियजनलाई घर फर्केको हेर्न चिन्तित परिवार र ४७ दिनको युद्ध तथा अभावको समाप्तिका निम्ति प्रार्थना गरिरहेका २० लाखभन्दा धेरै गाजावासीका लागि ठूलो झट्का हो ।

जटिल र सावधानीपूर्वक तयार गरिएको सम्झौतामा इजरायल र हमास चारदिने युद्धविराम गर्न सहमत भएका छन् । सम्झौताअन्तर्गत प्यालेस्टाइनी लडाकु समूहले अक्टोबर ७ मा गरेको घातक हमलामा बन्धक बनाइएका मध्ये कम्तीमा ५० व्यक्तिलाई रिहा गरिनेछ ।

रिहा गरिने प्रत्येक १० अतिरिक्त बन्धकका निम्ति युद्धमा थप एक दिनको ‘विराम’ हुने इजरायली सरकारले एक दस्तावेजमा जनाएको छ । रिहाइका निम्ति तोकिएका मध्ये तीन वर्षीय अबिगैल मोर इदानसहित तीन अमेरिकी रहेका छन् ।

बदलामा इजरायलले कम्तीमा १५० प्यालेस्टाइनी महिला र बालबालिकालाई रिहा गर्नेछ । हप्तौँको बमबारी तथा ठूलो लडाइँपछि घेरामा परेको तटीय क्षेत्रमा थप मानवीय सहायताको प्रवेशलाई अनुमति दिइनेछ ।

इजरायल, हमास, कतार, इजिप्ट र अमेरिका सम्मिलित धेरै साताको कुराकानीपछि गरिएको सम्झौताको कार्यान्वयनमा भएको यो ढिलाइको कारण तत्काल स्पष्ट हुन सकेको छैन ।

कतारको विदेश मन्त्रालयलका प्रवक्ता माजिद अल–अन्सारीले बिहीबार सम्झौताको कार्यान्वयन ‘जारी रहेको र सकारात्मक रूपमा भइरहेको’ बताए । “अबको केही घण्टामा युद्धविराम सम्झौताको टुंगो लगाइनेछ,” उनले भने । राससरएएफपी