काठमाडौं, ३० कात्तिक । चिनियाँ राष्ट्रपति सी चिनफिङ र अमेरिकी राष्ट्रपति जो बाइडेन उच्चस्तरीय सैन्य सञ्चार पुनः सुरु पुनर्स्थापित गर्न सहमत भएका छन् ।

सन् २०२२ मा तत्कालीन अमेरिकी सभामुख न्यान्सी पेलोसीले ताइवानको भ्रमण गरेपछि चीनले अमेरिकासँगको सैन्य सञ्चार बन्द गरेको थियो ।

दुई प्रमुख शक्तिबीच स्पष्ट संवाद नहुँदा सैन्य द्वन्द्वको सम्भावना हुने चिन्तासहित अमेरिकाले यसलाई पुनर्स्थापना गर्न खोजिरहेको थियो ।

दुई नेताबीच करिब एक वर्षपछि पहिलो पटक बुधबार सान फ्रान्सिस्को नजिक रहेको फिलोली एस्टेटमा आमनेसामने भेटवार्ता भएको हो ।

करिब चार घण्टाको वार्तामा द्विपक्षीय सम्बन्ध स्थिर बनाउने र सैन्य सञ्चार पुनर्स्थापित गर्ने लगायतका विषयमा सहमति भएको छ ।

यस वर्षको सुरुमा अमेरिकाले चीनले आफ्नो आकाशमा जासुसी बेलुन पठाएको आरोप लगाएपछि दुई देशबीचको सम्बन्ध तनावपूर्ण भएको थियो ।

दुई नेताले गाजा र युक्रेनमा भएको युद्ध तथा ताइवानका विषयमा पनि छलफल गर्ने अपेक्षा गरिएको थियो ।