काठमाडौं, ३० असोज ।  संयुक्त राष्ट्रसंघका महासचिव एन्टोनियो गुटेर्रेस आउँदो कात्तिक १२ गते नेपाल आउने भएका छन् । उनी चार दिनका निम्ति नेपाल आउन लागेको परराष्ट्र मन्त्रालय स्रोतले जनाएको छ ।

“राष्ट्रसंघका महासचिव चार दिनका लागि कात्तिक १२ गते नेपाल आउने कार्यक्रम तय भएको छ

यसअघि, उनी यही असोज २६ गते नेपाल भ्रमणमा आउने कार्यक्रम थियो । इजरायल र प्यालेस्टाइनी लडाकु समूह हमासबीच युद्ध चर्किएपछि गुटेर्रेसले असोज २३ गते नेपाल भ्रमण स्थगित गरेका थिए ।

प्रधानमन्त्री पुष्पकमल दाहाल ‘प्रचण्ड’ राष्ट्रसंघको ७८औँ महासभामा भाग लिन अमेरिकाको न्युयोर्क गएका बेला गुटेर्रेसलाई नेपाल भ्रमणको निम्तो दिएका थिए । त्यसपछि भ्रमणको मिति तय गरिएको थियो ।

तर, ७ अक्टोबरमा हमासले इजरायलमाथि आक्रमण गरेपछि सुरु भएको युद्धका कारण उनले नेपाल भ्रमण तत्काललाई स्थगित गरेका थिए । अहिले पुनः भ्रमणको मिति तय गरिएको हो ।

नेपालको शान्ति प्रक्रियालाई राष्ट्रसंघ महासचिवले बढी चासो दिएका छन् । नेपाल भ्रमणका बेला उनले नेपालको शान्ति प्रक्रियाका अलावा जलवायु परिवर्तनका असर र अतिकम विकसित राष्ट्रको हैसियतले नेपालले राखेका अपेक्षाका विषयमा छलफल गर्ने जनाइएको छ ।

नेपाल भ्रमणका बेला उनी पोखरा र लुम्बिनी जाने कार्यक्रम छ ।