काठमाडौं, २६ माघ । पर्यटन मन्त्रालयले जनाए अनुसार चिनियाँ नयाँ वर्ष मनाउन दुई साताको अवधिमा ३० हजार चिनियाँ पर्यटक नेपाल आउन लागेका छन्। चिनियाँ पर्यटक यति ठूलो संख्यामा नेपाल आउन लागेको पहिलो पटक भएको पर्यटन मन्त्रालयले जनाएको छ।

मन्त्रालयका अनुसार फेब्रुअरी ११ देखि २४ तारिक सम्म चाईनिज नयाँ वर्षमा हुने लामो छुट्टीमा उनीहरु नेपाल घुम्‍न आउन लागेका हुन्।

पर्यटन मन्त्रालयले चिनियाँ पर्यटकको नेपाल बसाईलाई अविस्मरणीय बनाउन काम गरिरहेको जनाएको छ।

बिहीबार पर्यटन मन्त्रालयमा पर्यटन सचिवको संयोजकत्वमा बसेको बैठकले चिनियाँ पर्यटकको बसाईलाई विमानस्थलदेखि नै व्यवस्थित गर्न विभिन्‍न निर्णयहरु तय गरेको छ।

पर्यटन मन्त्रालयका प्रवक्ता घनश्याम उपाध्यायका अनुसार, चिनियाँ विमानमा आउने यात्रुहरु लक्षित गर्दै अध्यागमन विभागले भिसा लगायतका बिषयमा सहजीकरण गर्न विमानस्थलमा छुट्टै डेस्क सञ्चा‍लन गर्ने, नागरिक उड्डयन प्राधिकरणले ब्यागेज ह्यान्डलिङलाई व्यवस्थित गर्न कनभेयर बेल्ट थप गर्ने, पर्यटन बोर्डले पनि विमानस्थल परिसरमा पर्यटकलाई सुचना दिन डेस्क संचालन गर्ने लगायतका निर्णय भएको छ।

यसका साथै पर्यटन बोर्डले चिनियाँ पर्यटकहरुलाई विमानस्थलमै स्वागत गर्ने बोर्डका मिडिया कोर्डिनेटर शरद प्रधानले जानकारी दिए।

यति ठुलो संङख्यामा चिनिया पर्यटरहरु आउनु अवसर भएको भन्दै उपाध्यायले भने, अहिले ठुलो संख्याँमा चिनियाहरु नेपाल भ्रमणमा आउनु हाम्रालागि अवसर हो तसर्थ हामीहरु पर्यटकको नेपाल बसाई सुखद बनाउन लागिरहेका छौं।’