काठमाडौं, २४ माघ । नेकपा एमालेले प्रदेश नं. ३ मा मुख्यमन्त्रीको तय निर्वाचन बाट गर्ने भएको छ ।

पार्टीको बुधबार बसेको प्रदेश सचिवालयको बैठकमा मुख्यमन्त्रीको आकांक्षीहरुले निर्वाचनबाट दलको टुंगो लगाउनुपर्ने अडान राखेपछि प्रदेशको संसदीय दलको नेता चुनावबाट छानिने भएको हो।

मुख्यमन्त्रीमा सहमति जुट्न नसकेपछि आगामी शुक्रबार बिहान ८ बजे प्रदेश संसदीय दलको बैठकपछि निर्वाचन गर्ने सहमति बनेको एमाले प्रदेश कमिटीले जनाएको छ।

मुख्यमन्त्रीका लागि प्रदेश संयोजक अष्टलक्ष्मी शाक्य र राजेन्द्र पाण्डेबीच मुख्य प्रतिस्पर्धा छ। काठमाडौंका पूर्व मेयर केशव स्थापित समेत मुख्यमन्त्रीमा दाबी गर्दै आएका छन्।

सचिवालय बैठकले ललितपुरको तुलसीलाल स्मृति प्रतिष्ठानमा शुक्रबार बिहान संसदीय दलको ज्येष्ठ सदस्यको अध्यक्षतामा बैठक बसेर निर्वाचन गर्ने निर्णय गरेको छ। त्यस्तै आगामी २७ गते बस्ने प्रदेश ३ को प्रदेशसभा बैठकबाट सभामुख र भोलिपल्ट उपसभामुखको निर्वाचन गर्ने कार्यसूची छ।