उपप्रधानमन्त्री तथा गृहमन्त्री नारायणकाजी श्रेष्ठले सुन तस्करीबारेको छानबिन समितिले त्यसको जरामा पुगेर कारबाही र समाधान सुझाउने बताएका छन्।

त्रिभुवन अन्तराष्ट्रिय विमानस्थलको सुरक्षा र व्यवस्थापनसँग सम्बन्धित सबै निकायका प्रमुखसहित विमानस्थल व्यवस्थापन र सामान निकासी प्रक्रियाबारे अनुगमनका क्रममा उनले विमानस्थलका सबै ठाउँमा प्रहरी राख्नु पर्ने बताएका छन् ।

श्रेष्ठले विमान अवतरणदेखि यात्रु–कर्मचारीको प्रवेश, तिनीहरूको हाते ब्याग र कार्गो निकासी प्रक्रियासम्मको अनुगमन गरेका थिए ।

सुन तस्करीबारे छानबिन गर्न राजश्व अनुसन्धान विभागले समिति बनाएको बताउँदै श्रेष्ठले अहिले सबै निकायले यसै समितिलाई सघाउने बताए।

गृहमन्त्री श्रेष्ठले विमानस्थल सम्बन्धित निकायले एकअर्काको कमजोरी देखाउने भन्दा पनि समन्वयात्मक र एकीकृत भएर काम गर्नुपर्ने भन्दै गृहमन्त्री रक्षात्मक रुपमा प्रस्तुत भए ।

विमानस्थलको भन्सारको जाँचपास प्रक्रियामा प्रहरीलाई पनि सहभागी गराउनेबारेमा सरकारले छलफल गरिरहेको श्रेष्ठले बताए ।

‘हामीले भन्सारका अधिकारीहरुलाई जाँचपासमा प्रहरी चाहिने नचाहिनेबारे सोधेका छौँ’, उनले भने, ‘उहाँहरूबाट प्रहरी राखे राम्रै हुने जवाफ दिनु भएको छ। मन्त्रिपरिषदमा पनि भन्सार जाँचपासमा प्रहरीलाई सहभागी गराउनेबारे छलफल गरेका छौँ। यसमा सरकारले निर्णय लिन्छ।’

मन्त्री श्रेष्ठसँग गृह मन्त्रालयका सचिव सहितका उच्च अधिकारीहरू, नेपाल प्रहरी, राष्ट्रिय अनुसन्धान विभाग, राजस्व अनुसन्धान विभाग, अध्यागमन विभाग र त्रिभुवन अन्तराष्ट्रिय विमानस्थल लगायत कार्यालयका प्रमुखहरू पनि थिए।

विमानस्थल भन्सारबाट छिरेको १०० केजी सुन बुधबार अपरान्ह राजस्व अनुसन्धान विभागको टोलीले सिनामंगलबाट बरामद गरेको थियो। यसले विमानस्थल व्यवस्थापन, सुरक्षा, निकासी र भन्सार प्रक्रियाको त्रुटीको पोल खोलिदिएको थियो।

पछिल्लो सुनकाण्ढमा गृहमन्त्री र अर्थमन्त्रीको भूमिकामाथि जनस्तरबाट व्यापक आलोचना भएको छ ।