संखुवासभा। पूर्वी पहाडी जिल्लासंखुवासभाको चैनपुर नगरपालिका वडा नं. ४ को प्याङ्कोट, हात्तिखर्क गाउँ निकै दुर्गम मानिन्छन् । सोही गाउ गत असार २ गते अविरल बर्षापछि आएको पहिरोबाट सिङगो गाउँ नै चिराचिरा परेको छ । मानवीय क्षति नभए पनि पहिराकोे उच्च जोखिम यथावत नै रहेपछि गाउँका १६ घरपरिवार विस्थापित भएका छन् । विस्थापित परिवार हाल अस्थायी रुपमा गाउँकै सामुदायिक भवनमा बसोबास गर्दै आएका छन् । हाल सम्म प्याङकोटमा स्थानीय, प्रदेश र संघीयका सरकारका कुनै पनि प्रतिनिधि पात्रहरुले अनुहार देखाएका छैनन । उनिहरुको हार गुहार सुन्ने सरकारी अनुहार नदेखिँदा स्थानीयमा थप पीडा र संसय पैदा भएको छ ।

दिउँसोभरी घर फर्किएर सामान्य काम गर्ने र छिट्टै बेलुकीको खाना खाएर सुरक्षित स्थानमा रहेको सामुदायिक भवनमा सबै गाउँलेहरु सुत्न भेला हुने गरेका छन् । दिउँसोको समयमा पहिरो गएको थाहा हुने तर, रातको समयमा केही थाहा नपाइने भएकाले उनीहरु सुरक्षित स्थानमा बास खोज्ने गरेको बताउँछन् ।

तर, पहिरोको जोखिमबाट विस्थापित भएका प्याङकोट वासिलाई कसैको सहयोग जुट्न भने सकेको छैन । मानवीय क्षति नभए पनि कुन बेला के हुने हो भन्ने केही भर नभएको स्थानीयको गुनासो छ । गाउँ फर्किएर आफ्नै घरमा सुत्न र कामगर्न पनि उनीहरु डराई रहेका छन् । बर्खाको समयमा निरन्तर बर्षा भइरहेको छ, कति बेला गाउँनै बगाउने हो केही ठेगान नभएको स्थानीय बताउँछन् ।

प्याङकोटको दर्दनाक अवस्थाका बारेमा जानकारी पाएपछि संखुवासभा इसाई समाज सो ठाउँमा पुगेको थियो । सोमबार उक्तगाउँका १६ घरपरिवारलाई संखुवासभा इसाई समाजले सहयोग गरेका छन् । १६ घरपरिवारलाई खाद्यान्न र ओढ्ने कपडा वितरण गरेको हो । विभिन्न चर्चमण्डली लगायत देशविदेशमा रहेकाहरुबाट ८० हजार बराबरको सामाग्री संकलनगरि घटनास्थलमा नै पुगेर स्थानीयलाई वितरण गरिएकोे संखुवासभा ईसाई समाजका अध्यक्ष लाक्पाछिरिङ शेर्पा बताउँछन् ।

यता पहिरो विस्थापितहरु यस्तै दातृसंस्थाहरुको सहयोगले हालसम्म टरिरहेको बताउँछन् । सरकारी निकायले नहेरेपनि सहयोगी मनहरुले सहयोग गरेपछि खुसी लागेको स्थानीयको भनाइ छ । प्याङकोटभन्दा माथिल्लो भुभाग जरिबुटे करिब ३ हजार मिटर बढि उचाइमा पर्छ । तलको सेवाखोलाको उचाई करिब १६ सय मिटर रहेको छ । पहिरो गएपछि केही दातृ संघसंस्थाले हालसम्म सहयोग गरिरहेका छन् । विस्थापित परिवारहरु हालसम्म पनि पालमुनि रात काटिरहेका छन् । पहिरोले अलैंची खेती, मकै र कोदाबारीहरु बगाएको छ ।

पहिरोको उच्चजोखिममा रहेको प्याङकोटको अवस्थाकाबारे स्थानीय सरकारका जनप्रतिनिधीहरुले थोरै भएपनि चासो देखाउन आवश्यक छ । होइन भने स्थानीय जनताले स्थानीय सरकारबाट के आशा गर्ने ?