काठमाडौं, २९ बैशाख । नक्कली शरणार्थी प्रकरणमा हाईप्रोफाइलकै नेताहरु प्रहरीको निशानामा पर्न थालेपछि ठुला पार्टीलाई सकस भएको छ । भुटानी शरणार्थी प्रकरणमा सदनको पहिलो र दोस्रो ठुलो दलकै नेताहरु एकपछि अर्काे गर्दै मुछिन थालेपछि पार्टीलाई धक्का लागेको छ । उच्च तहको प्रशासनिक र राजनीतिक व्यक्तिको आडमा भएको ठगीधन्दामा दर्जनौं व्यक्तिको संलग्नता खुल्नुका साथै सडक र सदनबाट खबरदारी हुन थालेकाले यस प्रकरणलाई सामसुम पार्न नसकिने टुंगोमा शीर्षनेताहरू पुगेका छन । आफूनिकट नेताहरू अनुसन्धानमा तानिँदा पार्टीको छविमा असर पर्न सक्ने चिन्ता कांग्रेस र एमाले नेतृत्वमा देखिएको छ । ठगीधन्दामा मुछिएर कांग्रेस नेता एवं पूर्वगृहमन्त्री बालकृष्ण खाँण पक्राउ परेपछि कांग्रेस, एमाले र माओवादीका शीर्षनेता थप दबाबमा परेका हुन । पछिल्लो समय उपराष्ट्रपतिको कार्यालयमा कार्यरत तत्कालीन गृहसचिव टेकनारायण पाण्डे नक्कली भुटानी शरणार्थी प्रकरणमा पक्राउ परेसँगै पूर्वगृहमन्त्री बालकृष्ण खाँण संशकित भइसकेका थिए । आफू गृहमन्त्री भएपछि खाँणले नै पाण्डेलाई गृहमन्त्रालयको सचिवको जिम्मेवारीमा ल्याएका थिए ।

गिरोहका सदस्यबाट आर्थिक लाभ लिएका पाण्डे पक्राउ पर्दा उनले आरोप अस्वीकार उनी प्रहरीले जुटाएका प्रमाणपछि भने उन्मुक्ति पाउने ठाउँ देखेनन् । पक्राउ पर्नुअघि नै प्रमाण मेटाउन आफूले प्रयोग गर्ने मोबाइल फर्म्याट गरिसकेका पाण्डेको मोबाइलको डाटा रिकभरका लागि प्रहरीको केन्द्रीय विधि विज्ञान प्रयोगशालामा पठाएको थियो । रिकभर भएरको मोबाइलमा प्रहरीले खाँण र पाण्डेबीच यो प्रकरणमा भएको आर्थिक लेनदेनको हिसाब पनि फेला पा¥यो । उक्त प्रमाणपछि सचिव पाण्डेले पनि बयानका क्रममा खाँणको पोल खोलिदिए । प्रहरीले यी सबै प्रमाण जुटाइसकेपछि खाँणका गतिविधि निगरानी गर्न थालेको थियो । उनी उम्कन सक्ने आशंकाले मंगलबारदेखि नै सादा पोशाकमा प्रहरीहरू परिचालन गरिएका थिए । बयानका क्रममा उनको संलग्नता प्रष्ट देखिएपछि प्रहरी निवासमै पुगेर पक्राउ गर्न बाध्य बनेको हो । मंगलबार बेलुका ७ बजेसम्म मोबाइल एक्टिभ नै राखेका खाँण त्यसपछि बन्द गरेर सम्पर्कविहीन भएका थिए । बिशेष पक्राउ पुर्जी बोकेर प्रहरी निवासमै आइपुग्दा पूर्वगृहमन्त्री बालकृष्ण खाँणघरमा चुकुल लगाएर बसिरहेका थिए । प्रहरी आएको पत्तो पाएपछि ढोका थुनेरै बसेका उनी निस्किने मुडमा थिएनन् । ढोकै फोडेरै प्रहरी भित्र पस्दा खाँणश्रीमती मञ्जुसँग भिडियो कलमा व्यस्त थिए । त्यसपछि पक्राउ परेका खाँणलाई अदालतले चार दिनको अनुमति दिएर थुनामा राख्न आदेश दिएको छ । सत्ता साझेदारी दलका नेता तथा पूर्व गृहमन्त्रीलाई हिरासतमा लिदाँ कांग्रेस सांसद अराजू राणा देउवा र मञ्जु खाण प्रहरीको निशानामा छन् । अनुसन्धानको दायरामा रहेका उनीहरुमाथि प्रहरी प्रमाण जुटाउनमा लागिपरेका छन् । जसले गर्दा अहिले पार्टीपंक्ति लाजमर्दाे अवस्था आइपुगेको छ । पूर्व गृहमन्त्री खाँण पक्राउ परेपछि पार्टी सभापति शेरबहादुर देउवाले आफू निकटका केही नेतासँग छलफल गर्दै गर्दा पार्टी महामन्त्री गगन थापाले नेता वा नाता जो भएपनि छोड्न नहुने अभिव्यक्ति दिएका छन् ।

तर बाँकी रहेका आरजु र मञ्जुलाई बचाउन देउवाको दौड र अनुसन्धानलाई सामसुम पार्न शीर्ष नेतृत्वको दौड सक्रिय बनेको छ । सार्वजनिक रुपमा एकअर्कालाई चेतावनी दिने तर भित्री कोठामा भयंकर जाल बुनिदैछ कि भन्ने शंकाले ठाउँ पाइरहेको छ । तथापी प्रधानमन्त्री प्रचण्डले आशंका नगर्न आग्रह गरेका छन् ।

सरकारले सत्ता गठबन्धनका नेतालाई जोगाउन प्रतिपक्षी सांसदमाथि मात्रै प्रहार केन्द्रित गरेको भन्ने एमाले अध्यक्ष केपी शर्मा ओलीको आरोपलाई यो घटनाक्रमले मत्थर पारेको छ । सत्ता पक्षकै नेता प्रहरी हिरासतमा रहँदा एमालेको सात्तो गएको छ । यसै प्रकरणमा नाम मुछिएका नेकपा एमालेका सचिव टोपबहादुर रायमाझी हाल प्रहरीको फरार सूचीमा छन् । अध्यक्ष ओलीले पार्टीभित्रको दवाव र खाँणको पक्राउपछि थप दवावको महसुस गर्दै रायमाझीलाई निलम्बन गरेका छन् । अध्यक्ष ओलीले भ्रष्टाचार प्रकरणमा उच्च पदस्थ व्यक्तिहरू र एमालेकै नेताहरूको नामसमेत आइरहेको भन्दै जोसुकैको नाम आएपनि दोषी भए कारबाहीको दायरामा ल्याउनुपर्ने बताएका छन् । उनले अनुसन्धानलाई अर्कोतिर लैजाने र अनावश्यक रूपमा पूर्वाग्रहपूर्ण ढंगले निर्दोषलाई फसाउने, आरोप लगाउने काम भने हुन नहुने बताए ।

गिरोह नै बनाएर सरकारी कागजमा जालसाजी गर्ने, शरणार्थी बनाउँछौं भनेर झूटा आश्वासन दिने र सर्वसाधारणबाट पैसा संकलन गर्ने काममा कडा प्रावधानमा मुद्दा चल्छ । यस्तो अवस्थामा संगठित अपराध, मानव बेचबिखन तथा ओसारपसार र किर्तेका दफालाई टेकेर अनुसन्धानको दायरा फराकिलो बनाउनुपर्नेमा प्रहरीले मुद्दा साँघुरो बनाउन खोजेको छ । तर, यति ठूलो अपराधमा पनि काठमाडौं प्रहरीले मुलुकी अपराध संहिताको ठगीसम्बन्धी कानुन मात्रै लगाएर अनुसन्धान गरिरहेको छ ।

प्रधानमन्त्री पुष्पकमल दाहाल प्रचण्डले आँट देखाइरहँदा यही कारण सत्ता गुमाउने छटपटी पनि छ । किनकि शक्तिशाली पार्टी शक्तिशाली पात्र यसमा मुछिएका छन् । खाँण पक्राउ पर्दै गर्दा उनकी पत्नी मञ्जु र काँग्रेस सभापति देउवा पत्नी आरजुलाई मोटो रकम बुझाएको बयान थुनामा रहेकाले बताएका छन् । यता, बाहिरी भाषणमा सघाउने आश्वासन दिएपनि एमाले अध्यक्ष ओली टोपबहादुरसहित पूर्वगृहमन्त्री रामबहादुर थापा बादललाई बचाउन सक्रिय देखिन्छन् । यही विषयमा छलफल गर्न ओली र प्रधानमन्त्री प्रचण्डबीच पटक पटक भेटवार्ता भएको छ । यो डरलाग्दो अपराधको गाँठो फुकाउँदा सर्वसाधारणबाट प्रशंसा पाएका गृहमन्त्री नारायणकाजी श्रेष्ठ पनि बालकोटमै पुगेर एमाले अध्यक्ष ओलीसँग भेटवार्ता गरेका छन् । जसले पनि नेतृत्वमाथि नै शंका बढाउने काम गरेको छ । त्यस्तै, अनुसन्धानका क्रममा पूर्वगृहमन्त्री रामबहादुर थापा बादल पनि मुछिएका छन् । तर उनीविरुद्ध गतिलो प्रमाण फेला नपरेपछि प्रहरीले अनुसन्धानको दायरामा ल्याएको छैन । पूर्वगृहसचिव तथा हाल अख्तियारको प्रमुख रहेका प्रेमकुमार राईमाथि पनि प्रश्न छ ।

गृहमन्त्री, सचिव अथवा गृहमन्त्रालयसँग सम्बन्धित व्यक्तिहरुबाट आम जनताले सामान्यतः देशमा हुने तस्करीबाट राष्ट्रलाई संरक्षण गर्ने विश्वास विश्वास राख्छन् । शान्ति सुरक्षाको प्रत्याभुत गराउने थलो ठान्छन् । तर नेपाली राजनीतिमा अपराधिकरण र अपराधलाई राजनीतिकरण गर्दा धेरैले न्यायको महसुस गर्न सकिरहेका छैनन् । एकले अर्कालाई दोषारोपण गर्दै शीर्ष नेतृत्वको बचाउमा लागेको कांग्रेस एमाले दुवै बदनाम भएका छन् । दलका शीर्ष नेता, मन्त्री, सचिवहरु नै मानवतस्करमा सामेल भएको घटना बाहिर आउन थालेसँगै आम नागरिकले सरकारप्रति हेर्ने दृष्टिकोण नै फरक बन्दै गएको छ ।