काठमाडौँ — प्रधानमन्त्री पुष्पकमल दाहाल र प्रमुख प्रतिपक्षी दल एमालेका अध्यक्ष केपी शर्मा ओलीबीच सिंहदरबारस्थित प्रधानमन्त्री तथा मन्त्रिपरिषद्को कार्यालयमा भेटवार्ता भइरहेको छ । प्रधानमन्त्री दाहाललाई भेट्न ओली दिउँसो १२ बजे सिंहदरबार पुगेका थिए ।

नक्कली भुटानी शरणार्थी प्रकरणमा एमालेका सचिव तथा प्रतिनिधिसभा सदस्य टोपबहादुर रायमाझीविरुद्ध पक्राउ पूर्जी जारी भएपछि र सरकारका सचिव टेकनारायण पाण्डेलगायत पक्राउ परेपछि ओली दोस्रो पटक प्रधानमन्त्री दाहाललाई भेट्न पुगेका हुन् । प्रधानमन्त्री दाहालका प्रेस संयोजक सूर्यकिरण शर्माका अनुसार दाहाल र ओलीबीच समसामयिक विषयमा करिब १२ बजेदेखि कुराकानी भइरहेको छ ।

ओलीले यसअघि वैशाख २१ गते प्रधानमन्त्री दाहाललाई भेटेर पूर्वउपप्रधानमन्त्री तथा सांसद रायमाझीलाई बाटोबाटै हत्कडी लगाउन नहुने बताएका थिए । प्रधानमन्त्री दाहाललाई भेटेपछि ओलीले भनेका थिए, ‘एउटा बहालवाला सांसद, पटक पटक मन्त्री, उपप्रधानमन्त्री भइसकेको मान्छेलाई बाटोबाटै हत्कडी लगाउनुपर्दैन, ऊ भागेर कतै जाँदैन, त्यसकारण यो निकै रहस्यमय छ ।’ त्यतिबेला रायमाझी गृहजिल्ला अर्घाखाँचीमा थिए । उनी पक्राउ पूर्जी जारी भएपछि फरार रहेका छन् ।