काठमाडौं, ११ बैशाख । सोमबार काठमाडौंको त्रिभुवन अन्तर्राष्ट्रिय विमानस्थलबाट उडेको फ्लाई दुबईको जहाजमा देखिएको समस्या समाधान भएर अहिले गन्तव्यतर्फ गइरहेको छ।

फ्लाइट राडारका अनुसार राति ११ बजे विमान भारतको नयाँदिल्लीको आकाश उडिरहेको छ। राति दस बजेर ४५ मिनेट जाँदा जहाज नयाँदिल्लीको आकाशमा ३४ हजार फिट माथि उड्दै छ। फ्लाई दुबईको एफजेट ५७६ नम्बरको जहाज ९ बजेर २० मिनेटमा काठमाडौंदेखि दुबईका लागि उडेको थियो। उड्ने बित्तिकै जहाजमा आगोको ज्वाला देखिएर पड्केको आवाज आएको थियो। समस्या आएको थाहा भएपछि पाइलटले जहाज धार्केमा लगेर होल्ड गरेका थिए। त्रिभुवन अन्तर्राष्ट्रिय विमानस्थलका महानिर्देशक प्रदीप अधिकारीका अनुसार पाइलटले धार्केमा पुगेर जहाजको निरीक्षण गरेका थिए।

धार्केमा केहीबेर रोकेर पाइलटले जहाजको परीक्षण गरेका थिए। सबै नर्मल छ भनेपछि गन्तव्यतर्फ उडेको हो, महानिर्देशक अधिकारीले भने, पाइलटले आफ्नो जहाजको समस्या समाधान भएको र गन्तव्यमा जान लागेको जानकारी दिएर गएका हुन्। जहाज अहिले सामान्य अवस्थामा भएकाले त्यसमा सवार यात्रुका परिवार र आफन्तजनलाई चिन्ता नलिन पनि उनीहरूले आग्रह गरेका छन्।