काठमाडौँ, २२ चैत । पेरिस ओलम्पिक २०२४ को महिला फुटबलतर्फ पहिलो चरण छनोटअन्तर्गत नेपाल भियतनामसँग पराजित भएको छ ।
त्रिपुरेश्वरस्थित दशरथ रंगशालामा भएको खेलमा नेपाल भियतनामसँग ५–१ को फराकिलो अन्तरले हार ब्यहोरेको हो । पहिलो हाफमा ३–० को अग्रता लिएको भियतनामले दोस्रो हाफमा थप २ गोल गर्यो । नेपालका लागि सावित्रा भण्डारीले सान्त्वना गोल फर्काइन् ।
भियतनामले नेपालको कमजोर डिफेन्स र खराब गोलरक्षकको भरपुर फाइदा उठाउँदै फराकिलो जित हासिल गरेको हो ।
खेलको ११औँ मिनेटमा नै भियतनामका लागि नुयेन थि टुएट जुङको पासलाई हाई येनले गोल गर्दै अग्रता दिलाएकी थिइन् । ३५औँ मिनेटमा भियतनामकी कप्तान हियुन नुलेले पेनाल्टीमा गोल गर्दै अग्रता दोब्बर पारिन् ।
लगत्तै तीन मिनेटपछि नुयन थि बिच थुवको बल अमृता जैशीको खुट्टामा लाग्दा आत्मघाती गोल भोग्दै पहिलो हाफमा नेपाल ३–० ले पछि परेको थियो ।
दोस्रो हाफको ४८औँ मिनेटमा भियतनामले अर्को गोल थप्यो । होआङ थि लोनको क्रसमा कप्तान हियुन नुले गरेको हेडर गोलरक्षक एन्जिला तुम्बाहाङ्फेले रोक्न सकिनन् ।
७९औँ मिनेटमा नेपालका लागि भण्डारीले गोल गरिन् । सरू लिम्बूले मिडफिल्डबाट खेलाएको थ्रु पासमा अफसाइड ट्रयाप बिट गर्दै सावित्राले गोलरक्षकलाई बिट गर्दै सुन्दर फिनिस गरिन् ।
भियतनामका लागि पाँचौँ गोल नुयेन थान नाले इन्ज्युरी समयको पहिलो मिटनमा ३५ याडै टाढाबाट गरिन् ।
प्रतिक्रिया दिनुहोस्