काठमाडौँ, २९ फागुन । जनता समाजवादी पार्टी (जसपा) नेपालबाट प्रतिनिधिसभा सांसद रामसहायप्रसाद यादव र राष्ट्रियसभा सदस्य प्रमिलाकुमारी यादवको उम्मेदवारी कायम राखेको छ ।

जसपाले प्रमिला यादवको उम्मेदवारी फिर्ता लिएर रामसहायको मात्रै कायम राख्ने तयारी गरेको थियो । त्यसका लागि अध्यक्ष उपेन्द्र यादवले पार्टीका शीर्ष नेताहरू र सत्तारूढ गठबन्धनका नेताहरूसँग छलफल गरेका थिए ।

छलफलमा सहभागी राजनीतिक दलका नेताहरूका अनुसार राष्ट्रपतिमा रामचन्द्र पौडेल निर्वाचित भइसकेको र उपराष्ट्रपतिमा महिला हुनै पर्ने मागसहित सर्वोच्चमा मुद्दा पर्ने कुरा उठेपछि दुवैको उम्मेदवारी कायम राख्ने निर्णय भएको हो ।

अदालतमा रिट परेमा न्यायाधीशले कस्तो निर्णय गर्न सक्छन् भन्ने यकिन नभएकाले नै उपराष्ट्रपतिमा गठबन्धनबाट जसपाका दुवै उम्मेदवारको नाम कायम राखिएको सत्ता गठबन्धनका एक नेताले जानकारी दिए । ती नेताका अनुसार मुद्दा नपरे वा दुवैको उम्मेदवारी कायम रहिरहे निर्वाचनअघिसम्म कुनै निर्णय लिइनेछ ।

जसपाका नेता तथा सांसद् प्रदीप यादवले भने प्रमिला यादवको उम्मेदवारीको हकमा पछि निर्णय लिइने बताएका छन् ।

उपराष्ट्रपति पदका लागि जसपाबाट रामसहायप्रसाद यादव, प्रमिला यादवसँगै नेकपा (एमाले)बाट अष्टलक्ष्मी शाक्य (बोहरा) र जनमत पार्टीकी ममता झाले उम्मेदवारी दिएका छन् । जसपा र जनमत पार्टी  सत्तारूढ ९ दलीय गठबन्धनमा आबद्ध छन् ।

उपराष्ट्रपतिको निर्वाचन चैत ३ गतेका लागि तोकिएको छ ।