काठमाडौं १० फागुन । नेकपा एकीकृत समाजवादीले राष्ट्रपतिबारे कसैले पनि पार्टी अध्यक्ष माधव नेपाललाई प्रस्ताव नगरेको दाबी गरेको छ।

पार्टी केन्द्रीय कार्यालयमा बुधबार भएको सचिवालय बैठकपछि पत्रकारहरूसँग कुराकानी गर्दै नेता झलनाथ खनाल अहिलेसम्म कसैले पनि हामीलाई राष्ट्रपति पदबारे प्रस्ताव नगरेको बताएका हुन् ।

एकीकृत समाजवादीको बुधबार बसेको सचिवालय बैठकले राष्ट्रपति पाएमा लिने निर्णय गरेको एक नेताले बताए। “राष्ट्रपति पद पाएमा लिने सर्वसम्मत निर्णय भएको छ,” उनले भने।

‘सचिवालय बैठकमा अध्यक्ष माधवकुमार नेपालले अहिलेको परिस्थिति र नेताहरूसँग भएका भेटवार्ताबारे ब्रिफिङ गर्नुभयो,’ खनालले भने, ‘राष्ट्रपति प्रस्ताव आएको भन्नेबारे केही भन्नु भएन त्यसकारण यो हल्ला मात्रै रहेछ भन्ने बुझ्नुपर्‍यो।’

उनले राष्ट्रपति निर्वाचनलगायत विषयमा अन्य दलहरूसँग पनि पार्टीले छलफल गर्ने बताएका थिए। एमालेसँग अहिले पार्टी एकता नहुने उनले संकेत गरेका छन्।

‘एमालेसँग कुरा मिल्न कठिन सवाल छ। मिल्दै मिल्दैन कसरी भन्ने, मिल्ने आधार पनि तय भएको छैन,’ खनालले भने।

पार्टी प्रवक्ता जगन्नाथ खतिवडाले सचिवालय बैठकले २ वटा निर्णय गरेको बताए। पहिलो, अग्रगमन शक्तिहरूसँग छलफल गर्ने। दोस्रो, राष्ट्रपति निर्वाचनबारे दलहरूसँग परामर्श गर्ने।

उनले पनि राष्ट्रपतिमा कसैले पनि अहिलेसम्म पार्टीलाई प्रस्ताव नगरेको दाबी गरेका थिए।

‘राष्ट्रपति निर्वाचन सम्बन्धमा कुनै पार्टीले प्रस्ताव गरेको छैन, यो च्याप्टर क्लोज भयो। कसैले प्रस्ताव गरे धारणा बनाउने हो। तर हामी संसदमा रहेका सबै दलहरूसँग छलफल भने गर्छौं,’ उनले भने।

राष्ट्रपति राजनीतिक दलभित्रैबाट हुनुपर्छ भन्ने पार्टीको धारणा रहेको उनको भनाइ छ।

नेकपा एमालेका अध्यक्ष केपी शर्मा ओली र एकीकृत समाजवादी अध्यक्ष माधवकुमार नेपालबीच केही दिनअघि भेटवार्ता भएको र उक्त भेटमा अध्यक्ष ओलीले अध्यक्ष नेपाललाई पार्टी एकतासहित राष्ट्रपतिमा प्रस्ताव गरेको खबर आएका थिए।