काठमाडौँ ३० पुस । नेकपा माओवादी केन्द्रका उपमहासचिव वर्षमान पुन आकस्मिक रुपमा रोल्पाबाट काठमाडौं ल्याएर अस्पताल भर्ना गरिएको छ । दुई दिनअघि आफ्नो निर्वाचन क्षेत्र रोल्पा पुगेका पुनलाई पुरानै रोग जन्डिस बल्झिएपछि हेलिकप्टरबाट आकस्मिक उद्धार गरी काठमाडौं ल्याइएको हो । पुनलाई सुमेरु अस्पताल ललितपुरमा भर्ना गरिएको छ ।

पुन निर्वाचनपछि पहिलोपटक रोल्पाको रुन्टीगढी गाउँपालिकामा न्यानो कपडा वितरणका लागि बिहीबार सडक मार्गबाट त्यहाँ गएका थिए ।पूर्वमन्त्री वर्षमान पुन पछिल्लो समय चीनमा उपचार गराएर पुस ५ गते मंगलबार स्वदेश फर्किएका थिए । वंशाणुगत जन्डिसपीडित पुन चुनावी धपेडीका कारण रोग बल्झिएपछि गत १६ मंसिरमा नेपाली चिकित्सकहरुको परामर्शमा फलोअप उपचारका लागि चीन गएका थिए । उनको सेनजेन प्रान्तस्थित थर्ड पिपुल्स् अस्पतालमा उपचार भएको थियो ।

पुनमा भएको रोगलाई चिकित्सकीय भाषामा ‘सिग्गलर नाजार टाइप टू सिन्ड्रोम’ भनिन्छ । पुनलाई यसै बर्ष पहिला थाइल्यान्ड र पछि दुई पटक सम्म चीनमा उपचार गरिएको थियो । पछिल्लो पटक चीनमा उपचार भइरहेकै बेला पुन यहाँ सरकार गठनको तयारी भएपछि नेपाल फर्केका थिए ।