काठमाडौं , २४ कात्तिक । विश्वभरका महिला नेताहरुको समूह वुमेन पोलिटिकल लिडर (डब्लूपीएल)ले राष्ट्रपति विद्यादेवी भण्डारीलाई ट्रेलब्लेजर अवार्डबाट सम्मान गरेको छ ।आइसल्याण्डमा आयोजित रेक्साभिक ग्लोबल फोरममा राष्ट्रपति भण्डारीलाई सम्मान गरिएको हो ।

सो सम्मेलनमा भाग लिन उनी गत सोमबार आइसल्याण्ड गएकी थिइन् । उनले सम्मेलनलाई सम्बोधन पनि गरिन् ।राष्ट्रपति भण्डारीसँग विभिन्न देशका महिला नेताहरूले शिष्टाचार भेटघाट समेत गरेका छन् । राष्ट्रपति भण्डारीसँग आइसल्याण्डका प्रधानमन्त्री एवं विश्व महिला नेतृत्व परिषदका अध्यक्ष क्याट्रिन याकोब्सडोटिरले शिष्टाचार भेट गरेको परराष्ट्र मन्त्रालयले जनाएको छ ।

भेटका अवसरमा नेपाल र आइसल्यान्डबीचको सम्बन्ध, लैंगिक समानता, जलवायु परिवर्तनलगायत विषयमा विचार आदानप्रदान भएको थियो ।त्यसैगरी राष्ट्रपति भण्डारीसमक्षम ‘वुमन पोलिटिकल लिडर्स’का संस्थापक तथा युरोपेली संसदका पूर्वउपाध्यक्ष सिल्भाना कोक–मेहरिन तथा विश्व महिला नेतृत्व परिषदका महासचिव लाउरा लिजउड र युएन वुमनका कार्यकारी निर्देशक सीमा बाहोसले पनि शिष्टाचार भेट गरेकी थिइन् । सम्मेलनका क्रमममा नै राष्ट्रपति भण्डारीसँग आइसल्याण्डबाट सगरमाथा र ल्होत्सेको सफल आरोहण गरेका महिलाहरुले पनि भेट गरे ।यसैगरी आइसल्याण्डमा बसोबास गर्ने नेपाली समुदायलाई राष्ट्रपति भण्डारीले सम्बोधन पनि गरेको उनका सञ्चारविज्ञ टीका ढकालले जानकारी दिए ।राष्ट्रपति भण्डारी यही कात्तिक २६ गते शनिबार स्वदेश फर्कने कार्यक्रम छ ।