काठमाडौँ, ७ असार । बारामा छिटो काम सक्ने बहानामा निर्माण कम्पनीले सिमरा विमानस्थलको धावनमार्ग मर्मतमा लापरबाही हुन थालेपछि रनवे जोखिममा पर्ने भएको छ ।

नियमन निकायको बेवस्ता गर्दै निर्माण कम्पनीले अटेर गरी काम सक्न पानी परिरहेकै अवस्थामा रनवेको सुचक चिन्ह पेन्ट माथिनै अस्तर लगाई धमाधम कालोपत्रे गरेसँगै रनवे जोखिममा पर्ने भएको हो । १० करोडमा ठेक्का सम्झौता गरेको सप्तकोशी जलाधार प्रा. ली. ले गत जेठ २४ गतेदेखि असार १२ गतेभित्र विमानस्थलको एक हजार १ सय ९० मिटर धावनमार्ग कालोपत्रे गर्ने जिम्मा पाएको हो । पानी परेकै बेला गरिएको रनवेको २५ मिटर कालोपत्रेको लेबल नमिलेको र जोईन्ट तलमाथि परेको छ भने क्रंकिट र पिचको मिश्रण समेत छुटेको छ । दिउँसो १ बजे देखि बिहान ५ बजेसम्म काम नभएको समयमा गरिने मर्मत हेर्न नागरिक उड्ययन प्राधिकरणले ४ जना छुट्टै प्राविधिक टोलीलाई जिम्मा दिएको छ । सप्तकोशी जलाधार प्रालीले पेटी ठेकेदारको रुपमा पप्पु कन्स्ट्रक्सनलाई प्रयोग गरेपछि रनवेको मर्मत कमजोर बन्ने अनुमान गर्न थालिएको छ ।

प्राधिकरणका इन्जिनियर स्मीता पुन्जालीले पानी परेको बेला काम रोक्ने गरेको बताउदै मर्मतकै चरणमा भएका त्रुटिपूर्ण काम सच्याउदै लैजाने बताउनुभयो । हाल सिमरा–काठमाडौं हवाई उडान बिहान ६ बजेदेखि दिउँसो १ बजेसम्म ४ वटा कम्पनीले ५ देखि ६ वटा मात्रै उडान भर्ने गरेको छ ।