काठमाडौँ, २५ बैशाख । प्रधानमन्त्री शेरबहादुर देउवाको गृह जिल्लामा नेपाली कांग्रेसलाई चुनौती भएको छ । प्रधानमन्त्री तथा काँग्रेस केन्द्रीय सभापति शेरबहादुर देउवाको गृहपालिका डडेल्धुराको गन्यापधुरामा एमाले र विपी कांग्रेसले चुनावी तालमेल गरेपछि नेपाली कांग्रेस डडेल्धुरालाई संकट परेको हो ।गाउँपालिका अध्यक्षमा वीपी कांग्रेसबाट सुरेन्द्र मालीको चुनाव चिन्ह करुवा र उपाध्यक्षमा एमालेका इन्द्र महराको चुनाव चिन्ह सुर्यले कडा चुनौती दिएको छ ।

नेपाली कांग्रेसका केन्द्रीय सभापति देउवाको गाउँपालिकामा उहाँकै चुनाव चिन्ह रुखलाई करुवा र सुर्यले मात्र चुनौती दिएका छैनन् कम्युनिष्ट पार्टी एकिकृत समाजवादीले समेत पनि कांग्रेसको रुख ढलाउन लागि परेको छ। एमाले र बिपी काँग्रेसले डडेल्धुराको स्थानीय तहमा चुनावी समीकरण गर्ने सहमति भएअनुसार जिल्लाका पाँच स्थानीय तहमा चुनावी समिरण गरि सँगसँगै मतदाताका घरदैलोमा भेटघाट कार्यक्रमलाई तीब्रता दिएका छन । क्रियाशील सदस्य विवादसँगै एकलौटी रुपमा अधिवेशन गरेको र विवाद समाधान नगरेको भन्दै कर्ण मल्ल समूहले विभिन्न चरणमा आन्दोलन समेत गर्दा पनि सुनुवाई नभएपछि अन्ततः स्थानीय निर्वाचनमा प्रतिपक्षी पार्टी एमालेसँग नेपाली काँग्रेस वीपीबाट चुनाव लड्ने घोषाणा गरेको हो । यता गएको पाँच वर्षको कांग्रेस नेतृत्वको गाउँपालिका कार्यसम्पादनप्रति असन्तुष्ट सर्वसाधारण पर्ख र हेरको स्थितिमा रहेका छन ।

प्रधानमन्त्री देउवाको गाउँपालिका गन्यापधुरासहित जिल्लाका अमरगढी नगरपालिका, नवदुर्गा गाउँपालिका, अजयमेरु गाउँपालिका र भागेश्वरमा एमालेसँग संयुक्त उम्मेदवार खडा गरेको छ भने पर्शुराम नगरपालिका र आलितालमा एमालेका उम्मेदवारलाई नेपाली कांग्रेस वीपीले समर्थन गरेको छ ।