काठमाडौं । नेपाली काँग्रेसको १४ औं महाधिवेशन अन्तरगत सोमबार भएको मतदानको मतगणना बुधबार साँझदेखि सुरु गर्ने तयारी भएको छ । राजधानीको प्रदर्शनीमार्गमा सोमबार भएको मतदानको मतपेटिका पार्टी कार्यालय सानेपामा लगेर राखिएको छ भने सो मतपेटिका बेलुकादेखि खोलेर गणना गर्न सुरु गरिने काँग्रेस निर्वाचन समितिका सदस्य एगराज पोखरेलले जानकारी दिनुभयो ।

उहांका अनुसार मतगणनाका लागि आज पार्टी कार्यालयमा बैठक बसेको र सबै प्रक्रिया सुरु गरेर साँझदेखि पदाधिकारीतर्फको गणना सुर गरिनेछ । सभापतिततर्फको मतगणनाको नतिजा आएसँगै पदाधिकारीतर्फको मतगणना सुरु गर्न लागिएको छ । ‘बैठक बसेर साँझदेखि पदाधिकारीको मतगणना गर्ने निर्णय गरेका छौँ’, उनले भन्नुभयो, ‘मतगणना दिउँसोदेखि नै गर्न सकिने अवस्था भएपनि गणकहरु धेरै दिनको अनिदो रहेकाले आरामरत हुनुहुन्छ । उहाँहरुलाई सम्पर्क गरेका छौँ, साँझ पार्टी कार्यालयमा आएर गणना सुरु गर्नुहुन्छ ।’

सोमबार भएको मतदानमा ४ हजार ६७९ मत खसेको थियो । सो मत भृकुटीमण्डपबाट पार्टी कार्यालयमा लगेर राखिएको थियो ।