काठमाडौं, २४ असार ।  नेकपा (एमाले) को आन्तरिक विवाद मिलाउने प्रयासमा रहेको कार्यदल बैठक आज पनि बस्दैछ । सिंहदरवारमा केहीवेरपछि बस्ने बैठकले सहमतिको थप प्रयास गर्ने कार्यदलका सदस्य सुरेन्द्र पाण्डेले जानकारी दिनुभयो ।हिजो बुधबार साँझ भएको अध्यक्ष केपी शर्मा ओली र नेता माधवकुमार नेपालको एक्लाएक्लै र सामुहिक संवादपछि वातावरण थप सकारात्मक बनेको विश्वास पलाएका बेला कार्यदल स्तरमा आज सहमतिको प्रयास गर्न लागिएको नेता पाण्डेले बताउनुभयो ।आन्तरिक विवाद मिलाउनेक्रममा दुवै पक्षका आफ्ना अडान र रिजर्वेसन रहेकाले त्यसमा मिलनविन्दु खोज्न केही समय लागेको हो नेता पाण्डेले भन्नुभयो, “आजको बैठकमा विषयकेन्द्रित छलफल हुन्छ, सकेसम्म सहमतिको वातावरण बनाउने हाम्रो कोसिस रहन्छ ।”
कार्यदलले सहमतिको मस्यौदा तयार गरेको बताए पनि त्यसमा अध्यक्ष ओली र नेता नेपालबीच सहमति बन्न सकेको छैन । दुवै नेताको अडान र चासोको विषयलाई लिएर आज पुनः कार्यदलमा गृहकार्य गरेर सहमतिका लागि अध्यक्ष र नेता नेपालबीच छलफल गराउने तयारी कार्यदलको रहेको नेता पाण्डेले जानकारी दिनुभयो ।