रौतहट, २७ जेठ ।रौतहटको गुजरा नगरपालिका अन्तर्गत पर्ने बकैया खोलाबाट मापदण्ड बिपरित नदी जन्य बस्तु उत्खनन गर्ने गरेको पाइएको छ ।

अमानतमा राजस्व उठाउदै आएको नगरपालिकाले २ ओटा ठेक्केदार कम्पनीसँग मोटो रकम लिएर मापदण्ड बिपरित नदी जन्य बस्तु उत्खनन गर्न अनुमति दिएको नगरपालिका श्रोतले जनाएको छ ।श्रोतका अनुसार नगर प्रमुख सन्तलाल चौधरी र निमित्त प्रमुख प्रशासकीय अधिकृत बिनोद जयसवालले आभा कन्सट्रक्सन तथा मुन्ना कन्स्ट्रक्सन नामक ठेक्केदार कम्पनीसँग मोटो रकम लिएर खोलामा स्काभेटर प्रयोग गर्न अनुमति दिएको बताएका छन् ।

स्काभेटर प्रयोग गर्न अनुमती पाएका दुई वटै ठेक्केदार कम्पनीले विकास निर्माणको कामका लागि नभएर खोला बन्द भएको समयमा बढी मूल्यमा गिट्टी बेच्ने उद्देश्यले नियम मापदण्ड बिपरित नदी जन्य बस्तु उत्खनन गरी भण्डारण गर्ने गरेको स्थानीयको भनाई रहेको छ ।

एक करोड पचाँस लाखमा ठेक्का लागेको उक्त खोलाको ठेक्का नगर प्रमुख चौधरी र प्रशासकीय अधिकृत जयसवालले विभिन्न जालझेल गरी रद्द गराएर आफु अनुकूल प्रयोग गर्ने गरेको स्थानीय बासिन्दा मनोज चौधरीले बताएका छन् ।

गत आर्थिक वर्षमा सोही खोला ठेक्का लगाएर एक करोड २५ लाख राजस्व उठाएका नगरपालिकाले चालु आर्थिक वर्षमा ६० लाख भन्दा बढी राजस्व उठ्न नसक्ने अनुमान खोलाको रसिद काट्दै आएका एक जना कर्मचारीले जानकारी दिएका छन् । यता खोलाको ठेक्का नलागे पनि आफूहरुले नगरपालिकाबाट स्काभेटर प्रयोग गरी नदी जन्य बस्तु उत्खनन् तथा भण्डारणको लागि अनुमति लिएको आभा कन्स्ट्रक्सनका संचालक किशोर ठाकुरको भनाई रहेको छ ।

आभा कन्स्ट्रक्सनका संचालक ठाकुरले नगरपालिकाबाट अनुमति लिएको दाबी गरे पनि पुर्व मन्त्री तथा जनता समाजवादी पार्टीका नेता गोविन्द चौधरीको ठाडो आदेशमा नगर प्रमुख चौधरीले खोलामा स्काभेटर प्रयोग गर्न अनुमति दिएको समाचार श्रोतले जनाएको छ । यस विषयमा नगर प्रमुख चौधरीले आफूलाई केही थाहा नभएको र आभा कन्स्ट्रक्सनको बारेमा अनविज्ञ रहेको प्रतिक्रिया दिएका छन् ।

यसै गरी गुजरा नगरपालिकाका प्रशासकीय अधिकृत जयसवालसँग बुझ्दा आफूले खोलामा स्काभेटर प्रयोगका लागि अनुमति नदिएको बताए पनि बिगत २ साता देखि निर्वाद रुपमा ४ ओटा स्काभेटरले मापदण्ड बिपरित नदी जन्य बस्तु उत्खनन गर्दै आएको स्थानीय बासिन्दा विश्वनाथ चौधरीले बताएका छन् ।