काठमाडौं,२५ जेठ ।  कोरोनाको दोस्रो भेरियन्ट सुरु भएपछि निक्कै सङ्कटपूर्ण अवस्थाको सामना गरेको छिमेकी मुलुक भारतमा दैनिक थपिने सङ्क्रमितको सङ्ख्या एक लाखबाट ओरालो लागेको छ ।

भारतमा पछिल्लो २४ घण्टामा ८७ हजार तीन सय ४५ जना नयाँ सङ्क्रमित थपिए । नयाँ थपिएका बिरामीको सङ्ख्या दोस्रो भेरियन्टपछि दैनिक सङ्क्रमण पुष्टि हुँदै आएको सङ्ख्याभन्दा निक्कै कम हो ।

महामारीको रुप लिएको कोरोनाका कारण विश्वकै ध्यान खिच्ने गरी नराम्ररी प्रभावित बनेको भारतमा यसअघि दैनिक चार लाखभन्दा बढी सङ्क्रमित थपिँदै आएका थिए । एक दिनमा चार हजारभन्दा बढीको मृत्यु हुने गरेको थियो ।

दैनिक थपिने कोरोना सङ्क्रमितको सङ्ख्या ओरालो लाग्दै जाने क्रममा भारतमा दोस्रो भेरियन्टपछि पहिलो पटक एक दिनमा एक लाखभन्दा कम सङ्क्रमित थपिएका हुन् । यसलाई भारतले महामारी नियन्त्रणमा उल्लेख्य सफलता प्राप्त गरेको रुपमा लिइएको छ ।

भारत आफैले पनि कोरोनाविरुद्धको खोप उत्पादन गरेर आफ्ना नागरिकलाई लगाइरहेको छ । अरु मुलुकलाई पनि खोप उपलब्ध गराउँदै आएको थियो । कोरोनाले कहालीलाग्दो अवस्था बनाएपछि भने भारतले अरु मुलुकमा खोप निर्यात रोकेको थियो ।

भारतमा नयाँ थपिने सङ्क्रमित सङ्ख्या उच्च हुँदा उपचार गराउने ठाउँको अभाव भएको थियो । स्वास्थ्य संस्था सङ्क्रमितले भरिएर उपचार निक्कै असहज बनेको हो ।

गम्भीर अवस्थाका सङ्क्रमितको उपचारका लागि आवश्यक पर्ने अक्सिजन अभावको सामना पनि भारतले गर्नुपर्ने अवस्था आयो । एकै दिन चार हजारभन्दा बढीको मृत्यु हुँदा सङ्क्रमितको शव व्यवस्थापन निक्कै सकसपूर्ण बनेको थियो ।

तर पछिल्लो समय दैनिक नयाँ थपिने र मृत्यु हुने सङ्क्रमितको सङ्ख्या कम हुँदै गएपछि भारतको अवस्था सामान्यतर्फ उन्मुख हुँदै छ । भारतमा अहिले १३ लाख आठ हजार आठ सय छ जनाको उपचार भइरहेकोमा आठ हजार नौ सय ४४ सङ्क्रमितको अवस्था गम्भीर छ ।

सङ्क्रमण पुष्टि भएकामध्ये दुई करोड ७३ लाख ३६ हजार सात सय ९९ जना उपचारपछि निको भएका छन् । सङ्क्रमित सङ्ख्या दुई करोड ८९ लाख ९६ हजार नौ सय ४९ पुगेको छ ।

सङ्क्रमितमध्ये तीन लाख ५१ हजार तीन सय ४४ जनाको मृत्यु भइसक्यो । एकै दिन दुई हजार एक सय १५ सङ्क्रमितको मृत्यु भयो ।

भारत कोरोनाका कारण प्रभावित हुनेमध्ये विश्वकै दोस्रो नम्बरमा रहेको मुलुक हो । सङ्क्रमित र मृत्यु हुने सङ्ख्याको हिसाबले पहिलो नम्बरमा अमेरिका रहेको छ ।