काठमाडौं , १० पुस । काठमाडौँ, १० पुस काठमाडौंको रत्नपार्कस्थित रानीपोखरीको पुन:निर्माणको काम पुरातत्व विभागले स्विकृत गरेको डिजाइन अनुसार नै अघि बढेको काठमाडौं महानगरपालिका प्रमुख विधासुन्दर शाक्यले बताउनुभयो ।
विसं २०७२ मा गएको भूकम्पले क्षति पुर्याएको रानीपोखरीको पुन:निर्माण बारे पछिल्लो समय विभिन्न खालका हल्ला चलिरहेको बेला उहाँले यस्तो धारणा व्यक्त गर्नुभएको हो ।

प्रमुख शाक्यले सम्पदा सबैको साझा सम्पत्ति भएकोले अनावश्यक विवाद झिकेर पुनःनिर्माण समस्या नल्याउन सबैसंग आग्रह गर्नुभयो । उहाँले रानीपोखरी पुनःनिर्माणको आयोजना आफू निर्वा्चित हुनुभन्दाअघिकै भएको भन्दै सम्पदा नमासिने गरी जति सक्दो छिटो काम सम्पन्न गर्न निर्देशन दिइसकेको पनि बताउनुभयो ।

“पुरातत्व विभाग, पुनःनिर्माण प्राधिकरण र महानगरको सहमतिमै राष्ट्रपतिज्यूले रानीपोखरी पुनःनिर्माणको शिलान्यास गर्नुभएको हो”, प्रमुख शाक्यले भन्नुभयो, “यो योजना पहिलाकै भएकाले मैले डिजाइनमा केही सामान्य हेरफेर गरेर पहिलाकैअनुरुप पुनःनिर्माण गर्न निर्देशन दिएको छु । ”

“रानीपोखरीमा वाटर फाउण्टेन राख्छौँ । यो पोखरीलाई रमणीय र सुन्दर पार्कका रुपमा संरक्षण र विकास गर्छौं”, उहाँले भन्नुभयो, “सकेसम्म रत्नपार्कको बीचको बाटोलाई पनि वैकल्पिक बाटो बनाएर यो रानीपोखरीको क्षेत्रलाई रत्नपार्कसम्म जोड्ने योजना छ ।”
उहाँले रानीपोखरी पुनःनिर्माणका क्रममा कंक्रिट हालिएको भन्दै पुरातत्वविद्हरुले आपत्ति जनाएकोप्रति संकेत गर्दै भन्नुभयो । रानीपोखरीलाई प्रताप मल्लले बनाएका हुन् भनेर त्यस्तै अवस्थामा छाड्ने नभई सम्पदाको संरक्षण गर्दै समयसापेक्ष बनाउने उहाँले बताउनुभएको छ ।