काठमाडौं, ३० बैशाख । नेकपा एमाले संसदीय दलका नेता केपी शर्मा ओली पुनःप्रधानमन्त्री पदमा नियुक्त हुनुभएको छ । राष्ट्रपति विद्यादेवी भण्डारीले संविधानको धारा ७६ (३) अनुसार संसदको सबभन्दा ठुलो दलको संसदीय दलको नेताको हैसियतमा ओलीलाई प्रधानमन्त्रीमा नियुक्त गर्नुभएको हो ।

राष्ट्रपति कार्यालय स्रोतका अनुसार सपथ भोलि शुक्रबार शपथ २ बजेतिर  हुनेछ । प्रधानमन्त्री ओलीले २७ वैशाखमा संसदको विश्वास पाउन नसकेपछि राष्ट्रपतिले तीन दिनभित्र संविधानको धारा ७६ (२) अनुसार दुई वा दुईभन्दा बढी दलको समर्थनमा सरकार गठनका लागि आहृवान गर्नुभएको थियो । तर राष्ट्रपतिले तोकेको समयसीमा भित्र कसैले बहुमत सिद्ध गर्न नसकेपछि कामचलाउ बनेका प्रधानमन्त्री बनेका ओलीलाई राष्ट्रपतिले प्रधानमन्त्रीमा नियुक्त गर्नुभएको हो ।

राष्ट्रपति विद्यादेवी भण्डारीले संविधानको धारा ७६ को उपधारा २ अनुसार सरकार गठनका लागि दिएको समयसीमा बिहीबार राति ९ बजे सकिएको थियो । नेपाली कांग्रेस, नेकपा माओवादी केन्द्र र जनता समाजवादी पार्टी मिलेर सरकार गठनको प्रयास गरिएको भए पनि अन्तिम समयमा आएर नेकपा एमालेको नेपाल पक्षले ओलीसँग सहमती गरेको र जसपाकै महन्थ ठाकुर केपी ओलीको पक्षमा खुलेपछी वैकल्पिक सरकार बनाउने योजना तुहिएको थियो ।