नेपालगञ्ज, १० वैशाख । बाँकेमा एक २८ वर्षिय युवकसहित थप तीन जना संक्रमितको उपचारका क्रममा मृत्यु भएको छ । नेपालगञ्ज मेडिकल कलेज कोहलपुर अस्पतालको कोभिड वार्डमा उपचाररत एक जना २८ वर्षिय युवकसहित अन्य दुई जना गरेर थप तीन जनाको विहिबार राती र शुक्रवार विहान मृत्यु भएको जिल्ला कोभिड १९ संकट व्यवस्थापन केन्द्र बाँकेले जनाएको छ ।
जिल्ला कोभिड १९ संकट व्यवस्थापन केन्द्र बाँकेका कोरोना फोकल पर्सन तेज ओलीले बनगाड ३ सल्यानका ५६ वर्षिय पुरुष र बाँके जानकी १ की ७१ वर्षिया महिलाको विहिबार राती र बाँके बैजनाथ ६ का २८ वर्षिय युवकको शुक्रवार विहान मृत्यु भएको बताउनुभयो ।

ती तीनै जनाको मेडिकल कलेजमा भेन्टिलेटरमा उपचार भैरहेकोमा अवस्था विग्रदैं गएपछि मृत्यु भएको फोकल पर्सन ओलीले बताउनुभयो । उहाँले उहाँहरुलाई संक्रमण पुष्टि भएलगत्तै स्वास्थ्य अवस्था विग्रन थालेपछि मेडिकल कलेजमा भर्ना गरिएको बताउनुभयो ।

कोरोना संक्रमणको दोस्रो लहरमा बाँकेमा दैनिक ३०० भन्दा बढी संक्रमित थपिन थालेपछि अहिले जिल्लाका कुनै पनि कोभिड वार्डमा विरामी राख्ने बेड र ठाउँ नरहेको जिल्ला कोभिड १९ संकट व्यवस्थापन केन्द्र बाँकेले जनाएको छ ।
एकातिर भेरी र मेडिकल कलेजमा बेड, आइसियु र भेन्टिलेटर खाली छैन भने अर्कोतिर दैनिक सयौंको संख्यामा गम्भीर खालका विरामी भएका संक्रमितको संख्या बढ्दै गएकोले जिल्लावासी त्रसित बन्दै गएका छन् ।
कोरोनाका विरामीको उपचारमा खटिएका चिकित्सक र स्वास्थ्यकर्मीहरुले स्थानीय, प्रदेश र केन्द्र सरकारसंग नेपालगञ्जमा तत्काल जनशक्तिसहितको डेढदेखि २ सय बेडको कोभिड अस्पताल निर्माण गर्न माग गरेका छन् ।