टोकियो, १६ चैत्र ।  जापानको राजधानी टोकियोको कोइवा शहरमा अप्रिलबाट नेपाली विद्यालय संचालनमा आउने भएको छ । नेपाली समुदायको आवश्यकतालाई मध्येनजर गर्दै हिमालय इन्टरनेशनल एकेडेमी संचालनमा ल्याउन लागेको विद्यालयले जनाएको छ । आईतबार विद्यालय परिसरमा पत्रकार सम्मेलन गरी नेपाली पाठ्यक्रम अनुसार पठन पाठन सुरु गर्न लागेको जानकारी दिएको हो ।

विद्यालय व्यवस्थापन समितीका अध्यक्ष राजन रिजालले विद्यालय संचालनका लागी आवश्यक सबै प्रकृया पूरा गरी पठन पाठन सुरु गर्न लागेको जानकारी दिनुभयो । उहाँले नेपाली पाठ्यक्रमा जापानी प्रविधीको उच्च प्रयोग गर्दै सवल र सक्षम नागरीक तयार गर्न संचालक समिती लागीपरेको बताउनुभयो । अध्यक्ष रिजालले विद्यार्थीहरुको सुरक्षा र सुन्दर भविष्यका लागी प्रतीवद्ध रहेकोले ढुक्क भएर बालबालीका भर्ना गर्न अभिभावकलाई आग्रह गर्नुभयो ।

पत्रकार सम्मेलनमा बोल्दै प्रधानाध्यापक शिशीर गौडेलले गुणस्तरीय शिक्षाका लागी कुनै कसुर बाकी नराख्ने बताउनुभयो । उहाँले दक्ष र अनुभवी शिक्षकको माध्यममबाट बालमनोविज्ञानमा आधारीत रही पठनपाठन सुरु गर्ने जानकारी दिनुभयो । वालवालीकाको सर्वाङगीड विकासका लागी पाठ्यक्रम संगै अतिरिक्त क्रियाकलापमा समेत जोड दिने बताउनुभयो ।

त्यसैगरी संचालक समितीका सदस्य रोशन केशीले विद्यालय संचालनका लागी नेपाल र जापान दुवै देशबाट स्विकृती लिनुपर्ने भएकोले सबै कानुनी प्रकृया पूरा गरी संचालन गर्न लागेको जानकारी दिनुभयो ।

तत्कालका लागी कक्षा नर्सरी देखि ४ सम्म संचालन गर्ने र कक्षा थप गर्दै एसईई सम्म पुर्याउने योजना रहेको बताईएको छ । १३ जना संचालक समिती रहेको विद्यालयमा १ जना विद्यार्थी बराबर मासिक शुल्क ४ मान (४० हजार ऐन) एकै परीवारको २ जना भए २५ प्रतिशत छुट र भर्ना शुल्क १ मान (१० हजार ऐन) तय गरेको समितीले जनाएको छ । भर्ना शुल्कमा पुस्तक र ड्रेस समेत समावेस गरेको बताएको छ ।

पत्रकार महासंघ जापान शाखाका अध्यक्ष मोहन घलेको प्रमुख आतिथ्यता सल्लाकार सुदिप अधिकारीको संचालनमा भएको कार्यक्रममा उपस्थित पत्रकारले जीज्ञासा राखेका थिए ।