काठमाडौं, ९ पुस । नेकपा विभाजनसँगै नेताहरुले गुट हेरफेर गर्ने क्रम पनि तीव्र भएको छ । कार्की पार्टी प्यालेसको बैठकमा सहभागी भएका स्थायी कमिटी सदस्य रघुवीर महासेठ बालुवाटार फर्के लगत्तै सोमवारको बालुवाटार बैठकमा सहभागी भएका केन्द्रीय सदस्य शेरवहादुर तामाङ प्रचण्ड माधव पक्षमा लागेका छन् । तामाङ आज कार्की पार्टी प्यालेसको बैठकमा सहभागी हुने भएका छन् । उहाँकी पत्नी उषाकला राईले ओली पक्षले गरेको मनोनयन अस्वीकार गर्नुभएको छ। सिन्धुपाल्चोकबाट निर्वाचित तामाङ ओली पक्षको संसदीय दलको बैठकमा पनि सहभागी हुनुभएको थियो । तर जिल्लामा माधव नेपाल पक्षको बर्चश्व रहेकाले कार्यकर्ताको दबाब थेग्न नसकेर उहाले प्रचण्ड माधव पक्षमा लाग्ने निर्णय गरेको निकट स्रोतले जनाएको छ । केहिदिन अघि नेकपा पुष्पकमल दाहाल प्रचण्ड-माधवकुमार नेपाल समूहको बैठकमा सहभागी भएको भोलिपल्टै नेता रघुवीर महासेठ प्रधानमन्त्री केपी शर्मा ओली समूहमा फर्किनु भएको थियो । काठमाडौंको बबरमहलस्थित कार्की पार्टी प्यालेसमा मंगलबार भएको प्रचण्ड नेपाल समूहको बैठकमा सहभागी महासेठ बुधबार ओली समूहमा फर्किनु भएको हो । हाल तटस्थ बसिरहेका नेकपा उपाध्यक्ष वामदेव गौतमनिकट महासेठकी श्रीमती जुलीकुमारी महतो भने यसअघि नै ओली समूहमा संलग्‍न हुनुहुन्छ । एक दिनमै प्रचण्ड( माधव समूहबाट बाहिरिएका महासेठलाई ओली समूहले तत्कालै जिम्मेवारी पनि दिएको छ। नेकपा औपचारिकरुपमा विभाजित भएपछि पछिल्लो समय नेताहरुले समूह फेर्ने क्रम बढेको छ।