संखुवासभा, २५ कात्तिक। प्रधानमन्त्री केपी शर्मा ओली बुधबार पूर्वी नेपालको चीनसंग सिमाना जोडिएको जिल्ला संखुवासभा आउने भएको छ ।

प्रधानमन्त्री ओली संखुवासभा आउने भएपछि जिल्लामा तयारी तीव्र पारिएको संखुवासभाका प्रमुख जिल्ला अधिकारी जीवनप्रसाद आचार्यले बताउनुभयो । उहाँको अनुसार, प्रधानमन्त्री ओली बुधबार बिहान साढे ८ बजे हेलिकप्टरमार्फत चीनसँग सिमाना जोडिएको उत्तरी क्षेत्रको किमाथांका नाका पुग्ने कार्यक्रम तय भएको प्रजिअ आचार्यले जानकारी दिनुभयो ।

संखुवासभाको चीनसंग नाका जोडिएको भोटखोला गाउँपालिका–१ मा पर्ने किमाथांका नाका, त्रिदेशीय (भारत, नेपाल र चीन) लिंकको रहेको राष्ट्रिय गौरवको उत्तरदक्षिण कोशी राजमार्गको अनुगमन गर्ने, त्यसपछि भोटखोला च्याम्ताङ राजमार्ग किमाथांका छिचोल्नका लागि नेपाली सेना तयार गर्दै गरेको बंकरको अनुगमन गर्ने कार्यक्रम छ ।

त्यसपछि प्रधानमन्त्री ओली बहुचर्चित नौ सय मेगावाटको अरुण तेस्रो जलविद्युत्त आयोजनाको अनुगमन गर्ने मकालु गाउँपालिका–५ स्थित फ्याक्सिन्दा ड्यामसाइटमा पुग्ने प्रजिअ आचार्यले बताउनुभयो ।

बुधबार बिहान साढे ८ बजे देखि साढे ३ बजे सम्म करिब ७ घण्टा संखुवासभाको तीन ठाउँमा बसेर अनुगमन गर्ने कार्यतालिका आएको प्रजिअ आचार्यको भनाइ छ ।

प्रधानमन्त्री ओलीसंगै हेलिकप्टरमा भौतिक पूर्वाधार तथा यातायात मन्त्री वसन्तकुमार नेम्बाङ, राष्ट्रियसभा विधायन व्यवस्थापन समितिका सभापति परशुराममेघी गुरुङ र संखुवासभाका संघीय सांसद राजेन्द्र गौतम सहित आउने तय भएको छ ।