काठमाडौं, १५ भदौ । नेपालका कोरोना भाइरस (कोभिड—१९) बाट पहिलो पटक स्वास्थ्यकर्मीको मृत्यु भएको पुष्टि भएको छ । भदौं १२ मा महोत्तरीको मनरा सिसवा—४ का अन्दाजी ४० वर्षीय हेल्थ असिस्टेन्ट (एचए) को उपचारका लागि काठमाडौं ल्याउँदै गर्दा बाटोमा मृत्यु भएको हो ।

महोत्तरीमै प्राइभेट प्राक्टिस गरिरहेका स्वास्थ्यकर्मी ७ भदौंमा बिरामी पर्नुभएको थियो । स्वास्थ्य अवस्था गम्भीर भएपछि काठमाडौं ल्याइँदैं गर्दा बाटोमा नै मृत्यु भएको आफन्त सुरेश सहनीले बताउनुभयो । ‘आइतबार नैबिरामी पर्नुभएको थियो त्यसपछि हामीले उहाँलाई १२ गते उपचारका लागि काठमाडौं ल्याउँदा ल्याउँदै भकुण्डेबेसीतिरै वित्नुभयो ।’ मृत्युपछि पनि उहाँलाई ललितपुरस्थित बयोधा हस्पिटल ल्याइएको थियो । बयोधामा उहाँको स्वाब लिएर कोरोना परीक्षण गर्दा रिपोर्ट पोजेटिभ आएको थियो ।

स्वास्थ्यकर्मीमा डायबटिज र स्टोनको समस्या रहेको थियो । नेपालमा हालसम्म कुनै पनि स्वास्थ्यकर्मीको कोरोनाबाट मृत्यु भएको रेकर्ड सरकारसँग नभएको इपिडिमियोलोजी तथा रोग नियन्त्रण महाशाखाका प्रमुख डा. वासुदेव पाण्डेले बताउनुभयो । उहाँले यो केश हो भने नेपालमा स्वास्थ्यकर्मीको मृत्यु भएको पहिलो रेकर्ड हुने पनि सुनाउनुभयो ।