चितवन, भाद्र १५ । माछापोखरी वरपर छाडिएको करेन्ट लागेर भरतपुरमा दुई जनाको मृत्यु भएको छ । भरतपुर महानगरपालिका–८ सल्यानीटोलमा रहेको माछापोखरीमा सोही वडाको आदिवासी टोल बस्ने लगभग ३५ वर्षका नवराज दराई र निरबहादुर राना मगर मृत फेला परेको चितवन जिल्ला प्रहरी कार्यालयले जनाएको छ । त्यो माछापोखरी नवलपुर गैंडाकोटका चुडामणि शर्मालगायतको रहेको प्रहरीले जनाएको छ ।

‘माछा चोरी हुन थालेपछि पोखरी वरपर करेन्ट छोड्ने गरेको भन्ने बुझेका छौं । मृतकहरु पोखरीसँग सम्बन्ध भएका व्यक्तिहरु हैनन् भन्ने छ । एउटाको हातमा माछा मार्ने जाल नै थियो । अर्काले तार नै समाएको थियो । गाउँलेहरुले देखेपछि बिहान सात बजेतिर प्रहरीलाई खबर गरे,’ चितवन जिल्ला प्रहरी कार्यालयका प्रवक्ता डीएसपी सूर्य थापाले भन्नुभयो। शवलाई पोस्टमार्टम गर्न भरतपुर अस्पताल ल्याइएको उहाँले जानकारी दिनुभयो ।
त्यसैगरी सोधपुछका लागि माछा पोखरीका मालिकमध्ये दुई जनालाई पनि प्रहरी कार्यालय ल्याएको उहाले जानकारी दिनुभयो । चितवनमा केही महिनाअघि भरतपुर महानगरपालिका–१५ मा रहेको एउटा माछापोखरीमा रातको समयमा माछा चोर्न आएको भन्दै रोक्न खोज्दा खुकुरी हानाहान भएको थियो । त्यो बेला पोखरीधनीको टाउकोमा गम्भीर चोट लागेको थियो ।