वीरगञ्ज १४ साउन। पर्सा जिल्लाको वीरगञ्जमा थप ३४ जनामा नोबेल कोरोनाभाइरस सङ्क्रमण पुष्टि भएको छ । नारायणी अस्पतालको पिसिआर ल्याबमा गरिएको परिक्षणमा थप ३४ व्यक्तिमा कोरोना सङ्क्रमण पुष्टि भएको हो।

नारायणी अस्पतालको पीसीआर ल्याबमा २ सय ७४ जनाको स्वाब परीक्षण गर्दा ३४ जनामा कोरोना संक्रमण पुष्टि भएको नारायणी अस्पतालका प्रमुख मेडिकल सुपरिटेन्डेन्ट डा. मदन उपाध्यायले जानकारी दिनुभयो । नयाँ थपिएका सङ्क्रमित २ देखि ६५ वर्ष उमेरका रहेका छन् भने नेपाल प्रहरीका प्रहरी जवान, नेपाली सेनाका सैनिक र कैदीबन्दीमासमेत सङ्क्रमण दिएको छ।

‘२ देखि ६५ वर्ष उमेरका ३४ जनामा कोरोना संक्रमण देखिएको छ, जसमध्ये ५ जना बालबालिका र १० जना महिला छन्,’ डा. उपाध्यायले भन्नुभयो । क्वारेन्टिनमा बस्दै आएका, कन्ट्याक्ट ट्रेसिङ र पेड पिसिआर परिक्षण गराएकाहरुमा पनि सङ्क्रमण दिएको देखिएको उहाले बताउनुभयो ।

सङ्क्रमितमध्ये २० जना वीरगञ्ज महानगरपालिकावासी रहेका छन् । उनिहरु वीरगञ्ज महानगरपालिकाको वडा नं ९, ५, ४, ११ श्रीपुर, आदर्शनगर, बेल्वा, भिस्वा, सिर्सियाका बासिन्दा हुन् । त्यसैगरी नेपाली सेनाका १ जना, नेपाल प्रहरीका ३ जना, कैदीबन्दी ६ जना, कारागारका कर्मचारी २ जना, स्वास्थ्यकर्मी १ जना र आफैंले पैसा तिरेर पीसीआर परीक्षण गराएका १ जना व्यक्तिमा कोरोना संक्रमण देखिएको डा उदयनारायण सिंहले बताउनुभयो ।

उहाले वीरगञ्जमा सञ्चालित कोभिड अस्थायी अस्पताल गण्डकमा सिमित बेड भएकोले थपिएका सङ्क्रमितहरुलाई अस्पताल भर्ना गर्न नसकिएको बताउनुभो । यसअघि थपिएका ४८ जना सङ्क्रमितपनि होम आइसोलेसनमा बस्दै आएका छन् ।

‘थप आइसोलेसनको व्यवस्था नहुँदा थपिएका नयाँ सङ्क्रमित घरमै बस्न बाध्य छन्,’ मेसु डा. उपाध्यायले भन्नुभयो , ‘छिट्टै आइसोल्सन व्यवस्था नभए स्थिति गम्भीर हुनसक्छ ।’ होम आइसोलेसनमा सङ्क्रमितहरु बस्दा सङ्क्रमण फैलन जोखिम थप बढ्ने चिकित्सकहरुले चिन्ता व्यक्त गरेका छन् ।

होम आइसोलेसनमा मापदण्ड पूरा नहुँदा परिवारजनमा समेत सङ्क्रमणको जोखिम बढ्ने जनरल फिजिसियन डा. घनश्याम यादवले बताउनुभयो । वीरगंज स्थित रहेको गणडक कोभिड हस्पिटल जम्मा ५० बेड क्षमता भएको गण्डक कोभिड अस्थ्यायी अस्पतालमा हाल ६२ जना सङ्क्रमितहरुको उपचार चलिरहेको अस्पतालका इन्चार्ज डा. उदय नारायण सिंहले बताउनुभयो ।

जसमध्ये पाँच जना आईसीयुमा छन् भने आठ जनालाई त्रिजुद्ध स्कुलको क्वारेन्टिनमा राखिएको छ । त्यसैगरी पाँच जना पर्सागढीको क्वारेन्टिनमा, ३ जना सखुवाप्रसौनीको क्वारेन्टिनमा र १ जना ठोरीको क्वारेन्टिनमा राखिएका छन् । वीरगञ्ज वाहेक जिल्लाका अन्य पालिकाहरुले आइसोलेसन बनाउँन सकेका छैनन् ।