काठमाडौं, ३१ जेठ । सभामुख अग्नि सापकोटाले संविधान संशोधन विधेयकमाथि समाजवादीकी नेपाल विरोधी सांसद सरिता गिरीले दर्ता गराएको संशोधन प्रस्ताव खारेज गरिदिनु भएको छ ।

शनिवार प्रतिनिधिसभा बैठकमा सभामुखले सो प्रस्ताव खारेज गरिदिएको जानकारी गराउनु भयो । प्रतिनिधिसभाको विधेयक शाखाबाट आएको टिप्पणीमा प्रतिनिधिसभा सचिव गोपालनाथ योगी र महासचिव भरतराज गौतमको राय हेरेपछि सभामुखले उक्त निर्णय लिदै संसदमा सुनाउनु भएको हो ।

गिरीको संशोधन प्रतिनिधिसभा नियमावली, २०७५ को नियम ११२ मा रहेका संशोधनका शर्त विपरीत रहेको टिप्पणी विधेयक शाखाबाट गएको थियो । सभामुखले निर्णय सुनाउदै गर्दा गिरीले बोल्ने प्रयास गरेपछि नेकपाका सांसदहरुले होहल्ला गरेका थिए । त्यसपछि सभामुखले गिरीलाई बोल्न समेत समय दिनुभएन ।

सभामुख अग्नि सापकोटाले नेपालको नयाँ नक्सा निशान छापमा समेट्न गरिएको संविधान संशोधन विधेयकमाथि गिरीले दर्ता गराएको संशोधन अस्वीकृत भएको घोषणा गरेलगत्तै उनी बैठकबाट बाहिरिएकी हुन् । समाजवादी पार्टीले पक्षमा मतदान गर्न ह्विप जारी गरेकाले उनि मतदानमा सहभागी नभए कारवाही हुने पक्का छ । तर के कारवाही गर्छ भनेर अहिलेसम्म कुनै निर्णय भएको छैन ।