काठमाडौँ, ५ जेठ । प्रधानमन्त्री केपी शर्मा ओलीले सबै अन्तर्राष्ट्रिय शक्तिसँग झगडा गरेर केही उपलब्धि नहुने बताउनु भएको छ ।

रकारले शुक्रबार पेस गरेको नीति तथा कार्यक्रममाथि परामर्श र निर्देशनका लागि आइतबार बालुवाटार बोलाइएका सांसदहरुसँग प्रधानमन्त्री ओलीले नेपाल र अमेरिकी सहयोग नियोगबीच भएको मिलेनियम च्यालेन्ज कम्प्याक्ट (एमसीसी) सम्झौता र भारतसँगको सीमा विवादको प्रसंग उठाउँदै यस्तो बताउनु भएको हो । ‘नीति तथा कार्यक्रममा पार्टीका साथीहरु एकढिक्का भएर प्रस्तुत हुनुपर्‍यो ।

विपक्षीले संशोधन प्रस्ताव राखिसकेको छ,’ भेटमा सहभागी एक सांसदले प्रधानमन्त्री ओलीले एमसीसीको विषय जोड्दै भनेको भनाइ उद्धृत गर्दै भने, ‘एमसीसी नलिँदा पनि हुन्छ । तर, भारतसँग पनि झगडा गर्ने, चीनसँग पनि झगडा गर्ने, अमेरिकासँग पनि झगडा गरेर बस्ने, अनि हामी तिमीहरुसँग केही पनि लिन्‍नौ भनेर हुन्न ।’ प्रधानमन्त्री ओलीले भन्नुभयो । नीति तथा कार्यक्रममा एमसीसीका केही कार्यक्रम समेटिएकोमा नेकपाभित्र मतभेद सुरु भएको छ । भारतले नेपाल भूमि मिचेर सकड खनेपछि भारतसँगको सम्बन्ध पनि तनावपूर्ण भएको छ । यही बेला प्रधानमन्त्रीले अन्तर्राष्ट्रिय शक्तिसँग झगडा गरेर केही उपलब्धि नहुने बताउनु भएको हो ।

शुक्रबार नीति तथा कार्यक्रम आएलगत्तै प्रधानमन्त्रीले शनिबारबाट परामर्श थालेका थिए । उनले शनिबार प्रतिनिधिसभामा संसदीय दलका उपनेता सुवास नेम्वाङ, प्रमुख सचेतक देव गुरुङ, राष्ट्रियसभाका संसदीय दलका नेता दीनानाथ शर्मा, प्रमुख सचेतक खिमलाल भट्टराईसँग नीति तथा कार्यक्रम र एमसीसीबारे छलफल गर्नुएभएको थियो । त्यसबाहेक प्रधानमन्त्रीले आइतबार र शनिवार केही सांसदसँग छलफल गर्नु भएको थियो ।

प्रधानमन्त्री ओलीले कोरोना भाइरसको महामारीका कारण सामाजिक दूरी कायम गर्नुपर्ने, विश्व स्वास्थ्य संगठन, स्वास्थ्य मन्त्रालय र चिकित्सकहरुको मापदण्ड पालना गर्नुपर्ने भएकाले संसद्‍मा पार्टीका तर्फबाट खेल्नुपर्ने भूमिकाबारे छलफल गर्न यस पटक संसदीय दलको बैठक आयोजना गर्न नसकिएको पनि बताउनुभयो ।