काठमाडौं । प्रतिनिधिसभाको शून्य समयमा छाउगोठ भत्काइएकोमा सांसदले आपत्ति जनाएका छन् ।

सांसद् गजेन्द्रबहादुर महतले काम नपाएको बुहारीले ……… पुछर कन्याएर बसेझैं गृहमन्त्रालयले प्रशासन लगाएर छाउगोठ भत्काएको भन्दै आपत्ति प्रकट गरेका हुन् ।
“हाम्रो गाउँघरतिर उखान छ, काम नपाए बुहारी………. पुछर कन्याऊ, गृहमन्त्रालय यस्तै छ । छाउगोठको नाममा हाम्रा घर भत्काइएको छ । एउटा व्यक्ति मृत्यु भयो भन्दैमा हाम्रो घर भत्काउन पाइन्छ ?  आठजना मान्छे होटलमा मृत्यु भएको छ । होटल भत्काउँदै हिँड्ने ? हजारौं मान्छे गाडीमा मृत्यु भएको छ । बस मा आगो लगाउदै हिँड्ने, आगो लगाउँदै हिँड्ने ?  त्यो पनि तरिका हुन्छ ?  चाहिँदो काम गर्नुपर्‍यो । जिल्लामा जाने नुन बेचिया छ । औषधि बेचिया छ । भ्रष्टाचार भएको छ उनीहरूलाई समात्नु छैन । पुलको बेहाल छ । बाटोको अवस्था के छ स्कुलको अवस्था के छ ?  ठेकेदार कहाँ भागेको छ ?  त्यो हेर्नुपर्दैन ?  हिजो गोर्खाली सेनाको नामम हाम्रो घर भत्काइयो । आज छाउगोठको नाममा भत्काइँदैछ । के हेरेर बसेको छ गृहमन्त्रालय ?  काम पाएको छैन ?  ” उनले प्रतिनिधिसभाको शून्य समयमा भने ।

पश्चिम नेपालका कतिपय जिल्लाहरुमा महिनावारी भएका महिलाहरुलाई छाउगोठमा राख्ने चलन छ । छाउगोठमा बसेकै अवस्थामा कतिपयको मृत्यु हुन थालेपछि सरकारले छाउगोठ भत्काउने अभियान चलाएको छ । स्थानीय प्रहरी प्रशासनले छाउगोठ भत्काए पनि स्थानीयले फेरि पुनर्निर्माण गरेर सञ्चालनमा ल्याउने गरेका छन्