सिरहा २३ मंसिर । लहानस्थित सिभिल बैङ्कको एटीएमको रकम लुट्ने प्रयास भएको छ ।लहान नगरपालिका वडा नम्बर–४ स्थितमा रहेको कृष्ण गुप्ताको घरमा भुइँतलामा भाडामा सञ्चालित बैङ्कको एटिएमको सटर फोरेर मान्छे पस्न सक्ने प्वाल बनाएर लुट्ने प्रयास भएको हो ।

आइतबार राति करिब १२ बजेतिर पहिलो तलामा सुरक्षा गार्ड रहेको समयमा एटिएम लुट्ने प्रयास गरेको भएपनि एटिएमभित्र राखिएको रकम भने सुरक्षित रहेको बैङ्कका शाखा प्रबन्धक सरोज घिमिरेले जानकारी दिनुभयो। उहाँका अनुसार एटिएमको सटरमा मान्छे पस्न सक्ने गरी काटिएको छ । एटिएममा राखिएको करिब १५ लाख रुपैयाँ झिक्ने प्रयास गरेको भएपनि लक भएकाले तोडफोड गरेको अवस्थामा भेटिएको छ । रकम सुरक्षित रहेको भएपनि करिब १५ लाख रुपैयाँ पर्ने एटिएम भने क्षतिग्रस्त भएको बैङ्कका शाखा प्रबन्धक घिमिरेले जानकारी दिनुभयो । करिब अढाइ महिनाअघि सिरहाको लहानस्थित कृषि विकास बैङ्कको युजर र पासवर्ड ह्याकिङ् गरी कर्मचारीको मिलेमतोमा करिब पाँच करोड रुपैयाँ रकमान्तर भएको थियो ।

प्रहरीले घटनास्थलको प्रकृति मुचुल्का उठाएर थप अनुसन्धान गरिरहेको जिल्ला प्रहरी कार्यालय सिरहाका निमित्त सूचना अधिकारी तथा प्रबक्ताले जानकारी दिनुभयो ।