काठमाण्डौं, २४ कार्तिक । आउँदो वर्ष रुसमा हुने विश्वकप फुटबलमा छनौट हुने क्रोयसियाको सपना लगभग साकार भएको छ ।
गएराति ग्रिसलाई ४–१ को फराकिलो अन्तरमा पराजित गर्दै क्रोयसिया विश्वकप खेल नजिक पुगेको हो । प्ले अफको पहिलो लेग अन्तर्गतको खेलमा १३ औं मिनेटमा पाएको पेनाल्टीमार्फत लुका मोड्रिकले गोल गर्दै अग्रता दिलाए । खेलको १९ औं मिनेटमा कालिनिकले गोल गर्दै क्रोयसियाको अग्रता दोब्बर पारे । खेलको ३० औं मिनेटमा ग्रिसका सोक्रतिसले गोल गर्दै खेलमा फर्कने प्रयास गरेका थिए तर लगत्तै ३३ मिनेटमा गोल गर्दै क्रोयसियाका पेरिसिकले ३–१ को अग्रता बनाए । खेलको ४९ औं मिनेटमा कम्राकिले गरेको गोलमार्फत क्रोयसिया ४–१ ले विजयी भयो । दोस्रो लेग आइतबार ग्रिसमा हुनेछ । यस्तै गएराति नै भएको खेलमा स्वीटजरल्याण्डले उत्तरी आयरल्याण्डलाई १–० ले हराएको छ ।
प्रतिक्रिया दिनुहोस्