उदयपुर, २७ कातिक ।   उदयपुरको रौतामाई गाउँपालिका वडा नंं ३ मा एक बालिकाको बलात्कारपछि हत्या गरेको आरोपमा ५ जना युवा पक्राउ परेका छन् ।  १२ वर्षीया बालिकाको बलात्कारपछि हत्या गरेको आरोपमा सोमबार  प्रहरीले पाँच युवालाई पक्राउ गरिएको हो ।

जिल्ला प्रहरी कार्यालय उदयपुरका प्रहरी नायव उपरीक्षक अर्जुन रानाभाटको नेतृत्वमा खटिएको टोलीले उनीहरुलाई पक्राउ गरेको हाे । ‘शंका लागेका पाँच युवा र तालिम प्राप्त कुकुरसहित शव लिएर टोली फर्केको छ’ । ‘शव पोष्टमार्टमको लागि जिल्ला अस्पताल ल्याइएको छ’ र पक्राउ परेका मानिसको नाम गोप्य राखेर अहिले अनुसन्धान भैरहेको प्रहरीले जनाएकाे छ ।

गएको शनिबार दिउँसो बाख्रा चराउनका लागि गएकी बालिका आइतबार दिउँसो गाउँको अमला जंगलमा मृत अवस्थामा फेला परेकी थिइन् । घटनाको अनुसन्धानको लागि जिल्ला प्रहरी उदयपुरले प्रहरी नायव उपरीक्षकसहितको तालिम प्राप्त कुकुरसहितको टोली अनुसन्धानको लागि पठाएको थियो ।