काठमाडाैं, २१ कात्तिक । नेपाल विद्युत प्राधिकरणका कार्यकारी निर्देशक कुलमान घिसिङले सबै नेपालीले लक्ष्मी पूजाको साँझ दिल खोलेर बत्ती बालून् भन्ने सन्देश दिन भवन सिंगारिएको बताए ।
‘हामीले भवन सिंगारेका छौं, यो प्रतीकात्मक हो । तपाईंहरू पनि दिल खोलेर बत्ती बाल्नुस् भन्ने,’ घिसिङले भने, ‘आज साँझ १२७० मेगावाट बिजुली माग हुने अपेक्षा छ, त्योभन्दा बढी भयो भने पनि हामी व्यवस्थापन गर्न सक्छौं । समस्या छैन ।’
नेपाल विद्युत प्राधिकरणको रत्नपार्कस्थित केन्द्रीय कार्यालय झिलीमिली बत्तीले सिंगारिएको छ। उज्यालोको प्रतिक दीपावलीको पूर्वसन्ध्यामा प्राधिकरणको भवन यसरी झिलीमिली पारिएको यो पहिलो पटक हो ।
दुई वर्षअघि लक्ष्मीपूजाको साँझदेखि काठमाडाैं उपत्यकामा लोडसेडिङ अन्त्य भएको थियो । पछि त्यो क्रम बढ्दै गएर अहिले देश लोडसेडिङमुक्त भइसकेको छ । यद्यपी पोहोरसम्म लक्ष्मीपूजाको दिन प्राधिकरणले सकभर कम बिजुली खपत गर्न आग्रह गर्ने गर्थ्यो ।
‘यसपाली हाम्रो उत्पादन बढेको छ, चोरी नियन्त्रण भएको छ, आयात पनि विश्वासनीय भएको छ तर त्यसको तुलनामा पिक आवरको लोड बढेको छैन’, घिसिङले भने, ‘त्यसैले हामीलाई समस्या छैन ।’
प्रतिक्रिया दिनुहोस्