काठमाडौं,२० कात्तिक । नेपाल स्टक एक्सचेञ्जले पूर्ण रुपमा अनलाईन कारोबार प्रणाली सुरु गरेको छ ।

मंगलबार अर्थमन्त्री डा. युवराज खतिवडाले काठमाडौंमा एक कार्यक्रमका बीच शेयर कारोबार पूर्ण रुपमा अनलाईनबाट गर्ने प्रणालीको शुभारम्भ गर्नु भएको हो । नेप्सेले केही महिनाको प्रयासपछि यो प्रणालीलाई पूर्ण रुपमा प्रयोगमा ल्याएको हो ।

यो प्रणाली सुरु भएसँगै शेयर लगानीकर्ताहरुलाई आफू बसेकै ठाउँबाट प्रविधिको उपयोग गरेर सहज तरिकाले सेयर कारोबार गर्ने बाटो खुला भएको छ । कार्यक्रममा बोल्दै अर्थमन्त्री खतिवडाले सो सेवाले सेयर कारोबारलाई सहज बनाउने विश्वास व्यक्त गर्नु भयो ।

अनलाईनबाट सेयर कारोबार गर्ने प्रणालीलाई व्यवस्थित बनाउन पनि मन्त्री खतिवडाले मातहतका निकायलाई सचेत गराउनु भयो । उहाँले शेयर बजारलाई सहज बनाएर आर्थिक गतिविधिलाई अघि बढाउन सरकारले प्रविधिको विकासका सक्दो पहल गर्ने प्रतिवद्धता पनि व्यक्त गर्नु भयो ।

कार्यक्रममा बोल्दै नेप्सेका प्रमुख कार्यकारी अधिकृत चन्द्रसिंह साउदले अनलाईन कारोबार प्रणालीले शेयर बजारलाई सन्तुलित ढंगले अघि बढाउन सहज बनाउने विश्वास व्यक्त गर्नु भयो । उहाँले ठूलो लगानी गरेर यो प्रविधि भित्र्याएको उल्लेख गर्दै यसको सदुपयोग गरेर अघि बढन पनि सम्बन्धित सबैलाई आग्रह गर्नु भयो ।

अव सेयर लगानीकर्ताहरुले इन्टरनेटको पहुँच भएको कुनै पनि स्थानमा रहेर आफैंले कारोबार गर्न सक्नेछन ।

अनलाईन कारोबार प्रणाली सुरु भएसँगै शेयर बजारले गति लिने अपेक्षा गरिएको छ । अनलाईन कारोबार गर्दा लगानीकर्ताहरुले आफ्नो ‘युजर नेम’ र ‘पासवड’ सुरक्षित राख्नुपर्नेतर्फ पनि नेप्सेले सचेत गराएको छ ।