काठमाडौ, १६ असार । यो आर्थिक बर्ष २०७३ /७४ मा नेपालमा इतिहासकै बढी धान उत्पादन भएको छ ।
यो बर्ष नेपालमा करिब ५२ लाख मेट्रिक टन धान उत्पादन भएको तथ्याङ्क सार्वजनिक भएको छ । चौधौ धान दिवसका अवसरमा बिहीबार चितवनको पर्यटकीय नगरी सौराहामा भएको रोपाई विशेष कार्यक्रममा बोल्दै चितवनको जिल्ला कृषि बिकास कार्यालयका प्रमुख एवं वरिष्ठ कृषि बिकास अधिकृत सुधिर श्रेष्ठले नेपालमा यो आर्थिक बर्षमा इतिहासकै बढी धान उत्पादन भएको बताउनुभयो । उहा“ले बढी धान उत्पादन भए पनि त्यतिले देशभर जनतालाई बर्षभर भात खान भने नपुग्ने बताउनुभयो । देशभरको माग अहिले करिब ५८ लाख ८७ हजार मेट्रिक टन रहेकाले अझै पनि ७ लाख मेट्रिक टन धान अपुग हुने उहाँको भनाई छ ।
चितवनमा भने यो बर्ष राम्रो धान उत्पादन भएको छ । चितवनमा कुल ८० हजार मेट्रिक टन धानको माग रहेको र अहिले जिल्लामा १ लाख २० हजार ५ सय मेट्रिक टन धान उत्पादन भएको छ । धानको उत्पादन बढाउनुपर्ने भएकाले अब देशभर सिचाँई क्षेत्रको बिस्तार गरेर बर्षको दुई बाली धान उत्पादन गर्न सके देशको माग पुरा हुने कृषि बिकास मन्त्रालयका सह सचिव अच्युत प्रसाद ढकालले बताउनुभयो ।