जनकपुरधाम, ६ कात्तिक । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले अलग मधेसको नारा दिनेहरु मधेसी जनताको मित्र हुन नसक्ने बताएका छन् ।

जनकपुरमा आयोजित नेकपाको प्रदेश २ को कार्यालय उद्घाटन तथा शुभकामना आदानप्रदान कार्यक्रममा प्रचण्डले राष्ट्रिय एकताले मात्र मधेसी जनताले चाहेको जस्तो समृद्धि, विकास, अधिकार र सम्मान स्थापित हुनसक्ने उनले बताए ।

‘विखण्डन गरेर मधेसी र पहाडी जनतालाई बर्बाद पार्ने काम साम्राज्यवादी, प्रतिक्रियावादी डाँकाहरुको मात्र हुनसक्छ, मधेसी जनताका मित्रहरुको हुन सक्दैन ’, उनले भने, ‘यदि कसैले अलग मधेस बनाउँछु भन्छ भने मधेसी जनताको आत्मसम्मानमाथि ठूलो धोका हुन्छ ।’ प्रचण्डले प्रदेश दुईका मुख्यमन्त्री लालबाबु राउतलाई प्रहरी एेन बनाएर ‘ओभरटेक’ नगर्न चेतावनी समेत दिए ।

संघीय एेन केही कारणले ढिलो भएको छ’ मुख्यमन्त्री राउतसमेत सहभागी रहेको कार्यक्रमलाई सम्बोधन गर्दै प्रचण्डले भने,‘केही ढिलो भएको छ भन्दैमा संघीय लोकतान्त्रिक संविधान बनाउने, समावेशी र समानुपातिक मान्यतालाई स्थापित गरेर अगाडि आउने नेतृत्वलाई उछिनापाछिन गर्ने गरी, बाटोमा दुर्घटना हुने गरी ओभरटेक गर्नु गल्ती हुन्छ, म मुख्यमन्त्री जीलाई भन्नु चाहन्छु । तपाईँ ओभरटेक गर्न थाल्नु भयो भने दुर्घटनाको खतरा हुन्छ, दुर्घटना ननिम्त्याउँ ।’

प्रधानमन्त्री केपी शर्मा ओली र आफूले फोरम अध्यक्ष उपेन्द्र यादवसँग संविधान संशोधनबारे सहमति गरेको उल्लेख गर्दै उनले ‘उपयुक्त समयमा संविधान संशोधन गरेर मधेसी जनताको हक अधिकारका निम्ति अगाडि बढ्ने’ बताए ।