नवलपरासी,४ कात्तिक । पूर्वी नवलपरासीको मध्यविन्दु नगरपालिका वडा नम्बर ११ अरुणखोलामा बस दुर्घटना हुंदा मृत्यु हुनेको संख्या छ पुगेको छ ।

इटहरीबाट भैरहवाका लागि छुटेको लु१ख ८४ ५४ नंको बस आइतबार बिहान ५ बजे अनियन्त्रित भई सडकबाट करिब ३५ मिटर तल खस्दा बसमा सवार पाँच जनाको घटनास्थलमा नै मृत्यु भएको हो ।

जिल्ला प्रहरी कार्यालय नवलपुरका प्रहरी उपरीक्षक रमेश थापाका अनुसार दुर्घटनामा घाइते एक जनाको उपचारको क्रममा मृत्यु भएको हो । मृत्यु हुनेमध्ये सुनसरीको कोशी गाउँपालिका वडा नम्बर ३ का अब्दुल अन्सारी, भोजपुरका रामजित राई, मोरङ, सुन्दरहरैचाका ११ वर्षीय सुहम कार्की, गुल्मीको हस्तीचौर गाउँपालिका वडा नम्बर २ का तिलक विष्ट र भारत बिहारका विद्यानन्द यादवको सनाखत भएको छ ।

मृतक एक जनाको सनाखत हुन नसकेको प्रहरीले जनाएको छ । ४० जना यात्रु बोक्ने क्षमताको बसले ५२ यात्रु बोकेको प्रहरीको भनाई छ । दसैंमा टिका सकेर आ–आफ्नो गन्तव्यमा हि“डेका यात्रु बसमा खचाखच रहेको बताइएको छ ।

बसका चालक निदाएका कारण बस राजमार्गबाट देब्रेतर्फ पल्टिएर दुर्घटना भएको हो । दुर्घटनामा १६ जना घाइते भएका छन् । ती मध्ये २ जनाको अवस्था गम्भीर रहेको प्रहरीले जनाएको छ ।