काठमाडौं,२८असोज । मलेसिया सरकारले नेपाली कामदार निशुल्क मलेशिया लौजान सहमत भएको छ । बैदेशिक रोजगारको रुपमा नेपालीहरु लाखौ तिर्नु पर्ने बाध्यता हटाउनका लागि नेपाल र मलेसियाबीच निशुल्क रुपमा नेपाली कामदार लैजान सहमत भएको श्रम, रोजगार तथा सामाजिक सुरक्षा मन्त्रालयले जनाएको छ ।

नेपाली कामदारलाई निशुल्क मलेसिया लैजाने व्यवस्थाको लागि कात्तिक १२ गते नेपाल र मलेसियाबीच समझदारीपत्र (एमओयू)मा हस्ताक्षर हुने बताइएको छ । समझदारीका लागि मलेसियाका मानव संशाधनमन्त्री एम कुलेसागरन ११ गते काठमाडौं आउनु हुने श्रम मन्त्रालयले जनाएको छ ।

बैदेशिक रोजगारीमा बढ्दो ठगिलाई रोक्नका लागि श्रम मन्त्री गोकर्ण बिष्टले केही महिनादेखि नेपाली कामदार मलेसिया जान रोक लगाएका थिए । कामदार नै रोकिएपछि मलेसिया भिसा प्रक्रिया निःशुल्क बनाउन सहमत भएको छ ।

मलेसिया सरकारले नेपालबाट श्रमिक आपूर्ति बन्द भएपछि सरकारीस्तरबाटै श्रम सम्झौता (जिटुजी) गरी नया प्रणालीमार्फत कामदार लिने इच्छा राख्दै गत महिना एमओयूको मस्यौदासहित प्रस्ताव पठाएको थियो । मस्यौदाको ड्राफ्टसहित नेपालले पहिलो पटक भदौ पहिलो साता जवाफ पठाएको थिया ।

मस्यौदामा छुटेका र कामदारका हकमा पर्न नसकेका विषयवस्तुलाई समेट्दै पुन दोस्रो पटक ड्राफ्ट मलेसिया पठाइएको हो । दुई देशबीच एमओयूको सहमति अनुसार नेपाली कामदारको भिसा प्रक्रियामा लाग्ने खर्च मलेसियन रोजगारदाताले व्यहोर्ने बताइएको छ ।

एमओयूमा हस्ताक्षरपछि मलेसिया जाने कामदारले कुनै शुल्क तिर्नु नपर्न मन्त्रालयका अधिकारीले जनाएका छन । हस्ताक्षर हुन लागेको एमओयुमा नेपाली कामदारका लागि दुई वर्षको करार अवधि रहने बताइएको छ ।