काठमाडौं,६ असोज । राष्ट्रिय जनता पार्टीका अध्यक्ष मण्डलका सदस्य अनिल झाले संविधान संसोधन गरि सबै जनताको अधिकार प्रत्याभूत गर्न सके नेपाल जस्तो राम्रो लोकतन्त्र कुनै देशमा नहुने बताउनुभएको छ ।

संघिय संसदको आयोजनामा काठमाडौको बसन्तपुरमा जारी लोकतन्त्र मेलामा शनिबार आयोजित अन्तक्र्रिया कार्यक्रममा झाले अहिले मुलुक संघियतामा गईसकेपछि लोकतन्त्रलाई बलियो बनाउन सबै एक हुनुपर्नेमा समेत जोड दिनुभयो ।

उहाँले अहिलेको संविधानले महिलालाई दिएको अधिकार सायदै अन्य मुलुकमा हुने गरेको भन्दै नेपालको महत्वपूर्ण निकायमा महिलाको नेतृत्व हुनु सकारात्मक बिषय भएको बताउनुभयो ।

उहाँले लोकतन्त्र स्थापना गर्नैकै लागी विभिन्न आन्दोलन भएको र अहिले मुलुकमा लोकतन्त्र स्थापना भएको जिकिर गर्नुभयो । झाले निर्वाचनपछि तीन तहको सरकार बनेको र जनताको अधिकार जनताकै घर दैलोमा पुग्नु सकारात्म विषय भएको धारणा राख्नुभयो ।

लोकतन्त्र मेलामा विभिन्न दलको स्टल पनि राखिएको छ । नेपालको राजनीतिलाई विश्वसामू परिचित गर्नका लागी मेला आयोजना गरिएको हो ।