काठमाडौं,३ असोज । शिक्षा ऐन आठौं संशोधनको कार्यान्वयन गर्न माग गर्दे देशभरका सामुदायिक विद्यालयका कर्मचारीहरु आन्दोलित भएका छन् ।

विद्यालय कर्मचारी संगठन नेपाल र नेपाल विद्यालय कर्मचारी युनियनले संयुक्तरुपमा बुधबार काठमाडौको माईतिघरमा विरोध प्रर्दशन गर्दे शिक्षा ऐन आठौं संशोधन कार्यान्वयनको माग गरेका हुन् ।

उनीहरुले सर्वोच्च अदालतको फैसलाअनुसार ‘सर्भिस ल’ कार्यान्वयन गर्नुपर्ने माग अघि सारेका छन् । त्यस्तै विद्यालयका कर्मचारीहरुले पनि शिक्षकसरहको सेवा–सुविधा पाउनुपर्ने उनीहरुको माग छ ।

शिक्षा ऐन आठौं संशोधनको दफा १६ अनुसार दरबन्दी, पदस्थापन, सञ्चयकोष, समायोजन, पोसाकभत्ता, निवृत्तभरणलगायतका सुविधाबाट आफूहरुलाई बन्चित गरिएको भन्दै आन्दोलनमा उत्रनुपरेको नेपाल विद्यालय कर्मचारी युनियनका संयोजक सुरेन्द्र प्रसाद शाहले बताउनुभयो ।

ऐन कार्यान्वयन गर्न पटक–पटक गरिएको अनुरोधलाई सरकारले बेवास्ता गरेकाले आन्दोलनमा उत्रन बाध्य भएको उनीहरुको भनाइ छ । उनीहरुले २८ वर्षसम्म सघंर्ष गर्दा पनि पटकपटक गरेका सम्झौता कार्यान्वयन नभएको गुनासो पनि गरेका छन् ।