काठमाडौं, २५ भाद्र । भारतको पुनेमा आज (सोमबार) बाट सुरु हुने बिमस्टेक राष्ट्रहरूको पहिलो संयुक्त सैन्य अभ्यासबाट नेपालसँगै थाइल्याण्ड पनि पछि हटेको छ ।
२५ भदौबाट ३१ सम्म चल्ने संयुक्त सैन्य अभ्यास भारतीय सेनाले आयोजना गरेको छ । जसमा बिमस्टेक राष्ट्रहरू म्यानमार, थाइल्याण्ड, भुटान, बंगलादेश, श्रीलंका र नेपालका सेनालाई सहभागि बनाउने भनिएको थियो ।
बिमस्टेक राष्ट्रहरूको चौथो शिखर सम्मेलनको क्रममा भारतीय प्रधानमन्त्री नरेन्द्र मोदीले संयुक्त सैन्य अभ्यासमा आमन्त्रण गरेपछि नेपालमा यो विषयले विवाद निम्त्याएपछि नेपालले शुक्रबार नै युद्ध अभ्यासबाट आफूलाई अलग गर्ने निर्णय गरेको थियो ।

संयुक्त सैन्य अभ्यासमा एक प्लाटुन अर्थात ३० जना नेपाली सेना सहभागी हुने भनिएकोमा अब ३ जना अधिकारी मात्रै पर्यवेक्षकका रुपमा संलग्न हुनेछन् । संयुक्त सैन्य अभ्यासबाट पछि हट्ने निर्णयसँगै प्रधानसेनापति पनि पुने नजाने भएका छन् । सोमबार पुनेमा संयुक्त सैन्य अभ्यास सुरु हुनुअघि थाइल्यान्ड पनि यसबाट पछि हटेको हो । केही भारतीय सञ्चार माध्यमले ‘पुनेमा हुने युद्ध अभ्यासमा थाइल्यान्डको सहभागिता नेपाल जस्तै पर्यवेक्षकको रुपमा मात्र रहने’ जनाएका छन् ।