काठमाडौं, २५ साउन । बानेश्वरमा रहेको एक ब्वाइज होस्टलको कोठाबाट गाँजा र तास फेला परेको छ । विद्यार्थी बस्ने कोठाको पलङ मुनि गाँजा र तास फेला परेको प्रहरीले जनाएको छ ।

जनप्रतिनिधि, होस्टल एसोसिएसन तथा प्रहरीको टोलीले होस्टेलमा गरेको अनुगमनका क्रममा बिहीबार प्रहरीले विद्यार्थीको कोठाबाट तास खेल्दै गरेको अवस्थामा गाँजा बरामद गरेको हो ।

नेपाल होस्टल एसोसिएनका केन्द्रीय अध्यक्ष चेतन दाहाल, वडा सदस्य रोहिणी श्रेष्ठ, सामुदायिक सेवा केन्द्र र टोल सुधार समितिका पदाधिकारी, बानेश्वर वृत्तका डिएसपी गोविन्दराज काफ्ले नेतृत्वको प्रहरी टोली अल्फा ब्वाइज होस्टल पुगेका थिए ।

अनुगमन टोलीले होस्टल सञ्चालकलाई नभेटेपछि सञ्चालकको नम्बर मागे । होस्टेलमा रहेका विद्यार्थीले केही बेर अन्कनाउँदै नम्बर दिए । निकैवेरसम्म पनि सञ्चालक नभेटिएपछि टोली तितरवितर हुँदै थियो । डिएसपी काफ्लेले बाहिरैबाट विद्यार्थीको एउटा कोठा अवलोकन गरे ।

कोठा भित्र रहेका विद्यार्थीहरु तास लुकाउँदै थिए । प्रहरी निरीक्षकको टोली कोठाभित्र प्रवेश गरेर हेर्‍यो । तासको बुक बरामद गर्‍यो । कोठामा चेकजाँज गर्दै जाँदा विद्यार्थीको पलङ मुनिको ड्रयरभित्र एउटा कागजको पोको फेला पर्‍यो ।

सुरुमा त कागज च्यातेर फालेको हो कि भन्ने प्रहरीलाई लाग्यो तर कागजमा गाँजा रहेको खुलासा भयो ।

केहीवेरमा होस्टल सञ्चालक सुराबहादुर खाम्चा ९सीबी० र उनकी श्रीमति सुशीला आइपुगे । महिलाले विद्यार्थीको बचाउ गर्न खोजिन् । तर, विद्यार्थीलाई सोध्दा उनीहरुले सञ्चालकलाई जवाफ फर्काउन सकेनन् । विद्यार्थीले अब त्यस्ता गतिविधि नगर्ने भनेर सुधार गर्ने प्रतिबद्धता जनाए ।

अनुगमन टोलीले सञ्चालकलाई प्रहरी वृत्तसम्मै पुर्‍यायो । र, आइन्दा सोही प्रकृतिका गतिविधि भेटिए कडा कारबाही हुने कागज गराउँदै होस्टल एसोसिएसनको रोहबरमा छोड्यो । होस्टल सञ्चालकलाई गराइएको कागजमा होस्टलमा सुरक्षाका लागि तल्लो तलामै कार्यालय राख्ने, नियमित मोनिटर गर्ने, सुरक्षा व्यवस्थित गर्ने लगायतका विषय उल्लेख गरिएको प्रहरीले जनाएको छ ।

वार्डेन र विद्यार्थीको लभ चक्कर

बानेश्वरकै एक होस्टलका वार्डेन र नजिकै रहेको गर्ल्स होस्टलकी विद्यार्थीबीच हेराहेर हुन थाल्यो । हेराहेरबाट छोटो अवधिमै उनीहरुको सम्बन्ध प्रेम सम्बन्धमा बदलियो ।

सुरुवाती दिनमा केही समस्या भएन, उनीहरुको सम्बन्ध राम्रैसँग चल्यो । तर, पछि उनीहरुको सम्बन्धमा फाटो आयो, सम्बन्ध टुट्यो । अनि समस्या झन् झन् बढ्न थाल्यो । युवतीले प्रहरीमा उजुरी दिन नै बाध्य हुन पर्यो ।

सम्बन्धमा तनाव आएपछि वार्डेनले युवतीलाई जथाभावी म्यासेज पठाउन र गाली गर्न थाले । प्रहरीका अनुसार, उनले युवतीलाई अश्लिल गाली समेत गर्न थाले । त्यसको सुइँको पाएर युवतीको दाइले वार्डेनलाई कुटेका पनि थिए । कुटपिटको घटना प्रहरीसम्म पुरग्यो । वार्डेन र युवतीका दाजु २४ घण्टा प्रहरीको थुनामा पनि बसे । अन्तिममा आइन्दा गल्ती नहोर्‍याउने सहमतिमा उनीहरुलाई छाडियो ।

प्रहरीका अनुसार, पछिल्ला समय होस्टलका कारण आफूहरुले समस्या भोगिरहेको भन्दै छिमेकीहरुले समेत सामुदायिक प्रहरीमा गुनासो पोख्न थालेका छन् ।

मादक पदार्थ सेवा गरेर आएर सञ्चालकले नै पिटाइ खानु परेकादेखि बर्थडे र अन्य विभिन्न बहानामा रातभर होहल्ला गर्ने गरेकोसम्म घटनाका उजुरी प्रहरीमा पर्ने गरेका छन् । केटाको होस्टलमा केटी आउने र केटीको हेस्टेलमा केटा पस्ने गरेको समेत अनुगमनको क्रममा पाइएको डिएसपी गोविन्दराज काफ्लेले जानकारी दिए ।