काठमाडौं, १३ असार । सामाजिक सञ्जालको दुरुपयोग गर्नेमाथि प्रहरी आक्रामक बन्ने देखिएको छ । सामाजिक सञ्जाल दुरुपयोग गर्दै विभिन्न व्यक्तिको चरित्र हत्या गर्ने, संघसंस्थाहरुको प्रतिष्ठामा आँच आउनेहरुमाथि कडा कारवाही गर्ने तयारी प्रहरीको छ ।

प्रहरीले सामाजिक सञ्जालको दुरुपयोग नगर्न अनुरोध गर्दै दुरुपयोग गर्नेमाथि कडा कारवाही गर्ने चेतावनी दिएको छ ।

महागनरीय प्रहरी अपराध महाशाखाले सार्वजनिक महत्वको सूचना जारी गर्दै सामाजिक सञ्जालको दुरुपयोग व्यापक बनेकोप्रति गम्भीर ध्यानाकर्षण भएको जनाएको छ ।

अपराध महाशाखाले सूचनामा भनेको छ– ‘संजालको दुरुपयोग गरी अर्काको नामको फेक आइडी बनाईँ फेसबुक, ट्वीटर, भाइबर, इमो, इन्ष्ट्राग्राम लगायतका सामाजिक संजालमा रहेका फोटोहरु तानी त्यस्ता फोटोहरु अनधिकृत रुपमा बिगारी, अश्लिल बनाई पोष्ट गरी ईज्जत प्रतिष्ठामा आँच पुर्याकउने, अश्लिल फोटो तथा भिडियोहरु बनाई पठाउने, शेयर गर्ने, धाक धम्की दिने, दवाव दिने, रकम ठगी गर्ने, रिचार्ज कार्ड माग गर्ने तथा कुनै व्यक्ति एंव संघ संस्था उपर जनमानसमा भ्रम सृजना गर्ने कुराहरु लेखी अपमान एंव गालिगलौज गरी कमेण्ट गर्ने जस्ता गतिविधि बढ्दै गएको प्रति यस महाशाखाको ध्यान आकर्षण भएको छ ।’

सामाजिक संजालको दुरुपयोग गरी विद्युतीय स्वरुपमा गैरकानुनी कुरा प्रकाशन गर्नेलाई बिद्युतिय कारोवार (ईलेक्ट्रोनिक) कारोवार ऐन, २०६३ अनुसार दुई लाख रुपैयासम्म जरिवाना वा पाँच बर्ष कैद वा दुवै सजाँय हुने व्यबस्था भएकोले त्यस्ता गतिविधिमा संलग्न नहुन सर्वसाधारणमा प्रहरीले अपिल गरेको छ ।

महाशाखाका प्रमुख एसएसपी धिरजप्रताप सिंहले पछिल्लो समय सामाजिक सञ्जाल दुरुपयोग गरेको भन्दै उजुरी बढेपछि यस्तो अपिल गरिएको बताउनुभयो ।