काठमाडौं, २५ जेठ । ३८ किलो सुन तस्करी र सनम हत्याका मुख्य अभियुक्त चुडामणि उप्रेती उर्फ गोरेलाई मोरङ कारागारबाट काठमाडौं ल्याइने भएको छ । ‘गोरे’बाट सुन तस्करी सम्बन्धी थप सूचना लिन उनलाई काठमाडौं ल्याउन लागिएको हो ।

गोरेसहित थुनामा रहेका प्रहरीका निलम्बित एसएसपी श्याम खत्री र डा. डेबिट भनिने छिरिङ वाङ्गेल घलेलाई पनि काठमाडौं ल्याउन लागिएको छ ।

सुन तस्करी र सनम शाक्य हत्या प्रकरणको छानबिनका लागि गृहमन्त्रालयका सह–सचिव ईश्वर पौडेलको नेतृत्वमा गठित समितिले गोरेसहितका ३ जनालाई काठमाडौं झिकाउन लागेको हो ।

गोरेलाई काठमाडौं ल्याउने प्रक्रिया थाल्न कारागार व्यवस्थापन विभागलाई पत्र समेत पठाइसकिएको छानबिन समितिका एक सदस्यले बताए ।

प्रहरीले पक्राउ गरेपछि अदालतमा उपस्थित गराइएका गोरेले आफ्नो बयानका क्रममा सुन तस्करीमा ठूलै व्यक्तिको संलग्नता रहेको बताएका थिए । बयानमा उनी व्यवस्थापनको काम गर्ने व्यक्ति मात्रै भएको उनले दाबी गरेका छन् ।

तर अदालतसमक्ष दिएको बयानमा भने उनले तस्करीमा संलग्न ठूला व्यक्ति भनिएका कसैको नाम खुलाएनन्। उनलाई काठमाडौंबाट जेठ ८ गते पक्राउ गरि मोरङ लगिएको थियो । उप्रेती प्रक्राउ परेपछि घटनाका अर्का अभियुक्त एसएसपी श्याम खत्रीले पनि मोरङ जिल्ला अदालतसमक्ष आत्मसर्मपण गरेका थिए ।

जिल्ला अदालत मोरङको आदेशअनुसार उनीहरुलाई हाल पुर्पक्षका लागि थुनामा राखिएको छ ।