काठमाडौं, १७ जेठ । सुन प्रकरणमा अभियुक्त एसएसपी श्याम खत्रीको थुनछेक बहस सुरु भएको छ।

करिब ४ घन्टा बयान लिईसकेपछि जिल्ला न्यायाधीश नारायणप्रसाद शर्माको इजलासमा उनको थुनछेक बयान सुरु भएको जिल्ला अदालतले जनाएको छ।

खत्रीका तर्फबाट अधिवक्ता हेमराज पन्तले बहस गर्दैछन् भने सरकारी तर्फबाट जिल्ला न्यायाधिवक्ता पुण्यप्रसाद ढकाल छन्।

खत्रीले बिहिबार जिल्ला अदालत मोरङमा आत्मसमर्पण गरेका थिए । उनीमाथिको थुनछेक बहस पनि आजैबाट सुरु भएको हो ।

२९ जना अभियुक्त जिल्ला अदालतको आदेशले थुनामा गएपछि सुन तस्करीका मुख्य आरोपीमध्ये एक खत्रीले अदालतमा आफै आत्मसमर्पण गरेका हुन्। प्रहरीले उनलाई पक्राउ गर्न रेड कर्नर नोटिस समेत जारी गरेको थियो।

सुन तस्करी प्रकरणमा मुख्य अभियुक्त भनिएका चूडामणि उप्रेती ‘गोरे’ले खत्री विमानस्थलमा रहँदादेखि सम्पूर्ण सुन भित्राउने गरेको बयान दिएका थिए। खत्रीले एक किलो सुन पास गराउँदा ५० हजार रुपैयाँ लिने गरेको पनि गोरेले बयान दिएका थिए।

खत्रीसँग सेटिङ मिलाउने भने छिरिङ वालेङ घले भएको उनको बयानमा उल्लेख छ। उनले पटकपटक गरेर १ करोड १२ लाख रकम लिएको भेटिएको थियो भने तस्करीमा संलग्न अन्य अभियुक्तले पनि उनको नाम लिएका थिए।

खत्रीको बयानले सुन तस्करी प्रकरणको माथिल्लो संलग्नता खुल्ने अपेक्षा गरिएको छ।