विराटनगर, ११ जेठ । ३३ किलो सुन तस्करी र सनम शाक्य हत्या प्रकरणमा मुख्य अभियुक्त चुडामणि उप्रेती ‘गोरे’को आज शुक्रवार पनि सकिएन ।
जिल्ला अदालत मोरङमा तीन दिनदेखि गोरेको बयान लिने क्रम जारी भएपनि आइतबार सकिने जिल्ला अदालत मोरङले जनाएको छ ।
निमित्त स्रेस्तेदार केदारप्रसाद गौतमका अनुसार आइतबारसम्म गोरेको बयान सक्ने लक्ष्य छ । त्यसपछि थुनछेक बहस शुरु हुनेछ । आइतबारको बयानमा गोरेलाई सुनकाण्डसँग सम्बन्धित भिडियो पनि देखाउने योजना रहेको बताइएको छ ।

गोरेले बयानमा औपचारिक भन्दा पनि अनौपचारिक विषयमा बढी केन्द्रीत भएकाले बयान लम्बिएको अदालतका कर्मचारीहरु बताउँछन् । जिल्ला अदालत मोरङमा शुक्रबार तेस्रो दिन पनि करिब साढे ४ घण्टासम्म उनको बयान लिइएको थियो ।

शुक्रबारसम्म बयान लिने क्रममा अदालतका कर्मचारीले गोरेले दिएको बयान २७ पानामा उतारेका छन् । यसअघि पहिलो दिन बुधबार ५ घण्टा र दोस्रो दिन बिहीबार पनि ५ घण्टा बयान भएको थियो । गोरेमाथि संगठित अपराध, अपहरण तथा शरीर बन्धक, कर्तव्य ज्यान र सुन चोरी पैठारीको मुद्दा लगाइएको छ ।